Tags-Raat

jin ḳhvāboñ se niind uḌ jaa.e aise ḳhvāb sajā.e kaun
ik pal jhūTī taskīñ pā kar saarī raat gañvā.e kaun

ye tanhā.ī ye sannāTā dil ko magar samjhā.e kaun
itnī bhayānak raat meñ āḳhir milne vaalā aa.e kaun

raat rukī hai aan kar zard safed ghaas par
laakh suḳhan hai darmiyāñ kis se kise judā karūñ

kaisī hai ajab raat ye kaisā hai ajab shor
sahrā hī nahīñ ghar bhī machātā hai ajab shor

tīrgī jaal hai aur bhālā hai nuur
ik shikārī hai din ik shikārī hai raat

vo raat kā sundar sannāTā chup sādhe hue jaise manzil
gañgā kī dhaḌaktī chhātī par armāñ ke diye jhilmil jhilmil

yuuñ raag sā chheḌe rahtā thā bahtā huā paanī kā dhārā
jaise koī jogī raat ga.e gaatā ho bajā kar ik taarā

jagah jagah pe bikhreñge ham sadā.eñ aur
ḳhamosh raat ko barbād karte jā.eñge

sub.h ko shaam kī nahīñ parvā
din bhī ab raat par nahīñ rote

ye raat tā.ir-e-hijrat-zada ġhanīmat hai
tulū-e-sub.h savād-e-kamīñ meñ hotī hai

kyā koī bhaTkā huā jugnū idhar bhī aa.egā
raat gahrī ho chalī hai raushnī ai raushnī

māh-gazīda raat hai sākit jaise koī ā.īna
os ke sabze par girne kī sannāTe meñ sadā aa.e

dastakeñ hoñgī dar-e-dil pe koī aa.egā
raat bhar ham isī ummīd meñ bedār rahe

kahā maiñ raat patañgoñ ko sham.a ke aage
giro ho aañkh meñ ma.ashūq kī ye kyā hai adab

thī āsmāñ pe merī chaḌhā.ī tamām raat
pheñkā kiyā huuñ tīr-e-havā.ī tamām raat

vo mai-parast huuñ ki na paa.ī agar sharāb
kī ḳhūn-e-dil se kār-ravā.ī tamām raat

ham-ḳhāna-e-adū hai mubārak rahe use
jhagḌā tamām roz laḌā.ī tamām raat

kyā ḳhush rahā maiñ dost kī tasvīr jaan kar
thī kal jo mah kī jalva-numā.ī tamām raat

bikhrī rahī hai shab mire baazū pe zulf-e-yār
kartā rahā huuñ ġhāliya-sā.ī tamām raat

baḌhtā rahā badan meñ mire dam-ba-dam lahū
siine pe thā vo dast-e-hinā.ī tamām raat