Tags-Raat

batā.ūñ kis havāle se unheñ bairāg kā matlab
jo taare pūchhte haiñ raat ko ghar kyuuñ nahīñ jaatā

rañg jaage the raat mahkī thī
aur itnā qarīb sā din thā

jab raat kā sannāTā hotā hai dil meñ ḳhalvat hotī hai
tum chāñdnī jaise chhiTkā do aisī kaifiyyat hotī hai

shaam mushfiq hai qarīb aa dard kā darmāñ kareñ
raat ke sahrā meñ apnā chāra-gar koī nahīñ

kal raat ḳhvāb meñ jo muqābil thā aa.ina
merā hī qad mujhe nazar aayā baḌhā huā

raat ne niiñd pahnī magar
ḳhvāb kī be-libāsī rahī

ye gum hote chehre ye manzar ye gard
samāñ raat din yaañ se jaane kā hai

sahar ho rahī thī magar raat ne
libās-e-urūsī utārā na thā

dair o kaaba meñ bhaTakte phir rahe haiñ raat din
DhūñDhne se bhī to bandoñ ko ḳhudā miltā nahīñ

raat kis kis ke uḌe haiñ purze
shahr meñ kyā hai ḳhabar jānte haiñ

raat kaaTe nahīñ kaTtī hai magar
raat hai tā-ba-sahar jānte haiñ

'farhat-ehsās' taġhazzul se sharābor huā
raat āġhosh meñ kuchh yuuñ ye ġhazal aa.ī mirī

jalte rahe haiñ apne hī dozaḳh meñ raat din
ham se ziyāda koī hamārā adū na thā

dard-e-tanhā.ī se sote-jāgte kaaTī thī raat
sub.h ne marham rakhā aisā gavārā ho gayā

kab Thahregā dard ai dil kab raat basar hogī
sunte the vo ā.eñge sunte the sahar hogī

ye kis ḳhayāl meñ din-rāt ab guzarte haiñ
na jāgne kā koī vaqt hai na sone kā

jaane ye kaisā daur hai jis meñ jur.at bhī to mushkil hai
din ho agar to us ko likhūñ din raat agar ho raat likhūñ

saal bhar dil lagā.eñ paḌhne meñ
raat din fikr-e-imtihāñ se bacheñ

raat kā karb hai gulbāñg-e-sahar kā ḳhāliq
pyaar kā giit hai ye dard ujāloñ ke liye

raat ko sone ko kyā kyā narm-o-nāzuk the palañg
baiThne ko din ke kyā kyā koThe aur dālān the