Tags-Raasta

vo mire ishq kī gahrā.ī samajhtā hī nahīñ
rāsta duur talak jaa.e to bal khātā hai

yuuñ to vo ek aam sā patthar hai miil kā
lekin vahāñ se aage agar rāsta na ho

chal paḌā huuñ shauq-e-be-parvā ko murshid maan kar
rāsta pur-pech hai yā pur-ḳhatar jaisā bhī hai

girte peḌoñ kī zad meñ haiñ ham log
kyā ḳhabar rāsta khule kab tak

safar meñ ab ke ajab tajraba nikal aayā
bhaTak gayā to nayā rāsta nikal aayā

ab bhī darvāza roz khultā hai
rāsta merā tak rahā hai koī

bad-dimāġhī mirī hai vahī jo ki thī tarz-e-ḳhud-bīñ tumhārā vo hai jo ki thā
chal rahe haiñ anā ke sahāre magar rāsta hī nahīñ vāpsī ke liye

maiñ jo manzil pe ḳhud nahīñ pahuñchā
usī manzil kā rāsta huuñ maiñ

zindagī meñ aisā kitnī baar hotā hai yahāñ
manziloñ kā rāsta dushvār hotā hai yahāñ

dozaḳh meñ jī rahā huuñ isī ek aas pe
jannat ko koī rāsta jaatā zarūr hai

junūn-e-ishq jise sar-phirā banā degā
pahāḌ kaaT ke vo rāsta banā degā

rāsta samundar kā jab rukā huā paayā
aur bhī kināroñ ko kāTtā huā paayā

tumhāre saath huuñ phir bhī akelā
rafīqo rāsta do thak gayā huuñ

na aa sakā vo mire ghar to kyā huā 'nāzim'
ki rāsta bhī to aisā ghumāv kā thā ki bas

yahī hai rāsta ab dūriyāñ baḌhā.eñge
baḌhīñ ham us kī taraf kaise fāsle hī nahīñ

yuuñ har ik fard-e-tahayyur kī hai tasvīr 'shamīm'
shahr meñ rāsta bhūlā huā bachcha jaise

mohabbatoñ kā maiñ rāsta huuñ mujhe duāoñ meñ yaad rakhnā
jo tum na dekho maiñ dekhtā huuñ mujhe duāoñ meñ yaad rakhnā

pīchhe muḌ ke dekhnā achchhā lagā
ghar kā ḳhālī rāsta achchhā lagā

talāsh kartī haiñ ḳhud manzileñ jise 'ahmad'
maiñ dasht-e-shauq meñ vo rāsta banātā huuñ

rāsta deñ ye sulagtī bastiyāñ to ek din
qarya-e-jāñ meñ utarnā ye nagar bhī dekhnā