pīchhe muḌ ke dekhnā achchhā lagā
ghar kā ḳhālī rāsta achchhā lagā
sāhiloñ par haath lahrāne lage
mujh ko apnā Dūbnā achchhā lagā
shaam jaise āñkheñ jhapkāne lagī
us ke hāthoñ meñ diyā achchhā lagā
bachche ne titlī pakaḌ kar chhoḌ dī
aaj mujh ko bhī ḳhudā achchhā lagā
halkī bārish thī havā thī shaam thī
ham ko apnā bhīgnā achchhā lagā
vo darīche meñ khaḌī achchhī lagī
haar bistar par paḌā achchhā lagā
jāntī thī vo maiñ ruk saktā nahīñ
lekin us kā roknā achchhā lagā
vo to 'qaisar' mar miTī mere liye
jaane us ko mujh meñ kyā achchhā lagā