Tags-Qatil

aaj qātil kā gale par mire ḳhanjar chamkā
lillāhil-hamd ki merā bhī muqaddar chamkā

ya.anī qātil ke liye rahm kā jazba mafqūd
is se baḌh kar nahīñ ho saktī adāvat ham se

is ko maarā us ko maarā ye bismil vo TuuT gayā
nok palak vāloñ se Dariye qātil un ke ishāre haiñ

haath pahuñchā na pā-e-qātil tak
tāle.oñ kī ye nā-rasā.ī hai

ajab aalam nazar aayā tire kūcha meñ o qātil
kahīñ koī sisaktā hai kahīñ koī taḌaptā hai

pūchh aa qātil se to vo kab karegā ham ko qatl
aaj ham tārīḳh-e-marg aap ai qazā kahne ko haiñ

jis haath se mujh ko qatl kiyā us haath kā kalima paḌhvāyā
lī jaan to ḳhair ehsān kiyā qātil ne magar īmān liyā

Dhīlā paḌtā thā suulī kā phandā us kī gardan par
mere qātil ko munsif ne fidya le kar chhoḌ diyā

kyā zarūrī hai ki dushman hī ke sar jaa.e azaab
kar deñ ahbāb hī qātil ke havāle mujh ko

kaun hai maqtūl qātil kaun sab ḳhāmosh haiñ
be-hisī hai varna āñkhoñ se chhupā kuchh bhī nahīñ

hai hai koī dil dene ke qābil nahīñ miltā
armān taḌapte haiñ ki qātil nahīñ miltā

yārab tamkīñ dahr meñ qātil nahīñ miltā
phīke kisī dilbar se mirā dil nahīñ miltā

chārasāzoñ kī vo qātil ġhaflateñ
dard-mandoñ kī vo ġhairat-dāriyāñ

jab muḳhātab kiyā qātil ko to qātil likhkhā
lakhnavī ban ke masīhā nahīñ likhkhā maiñ ne

hazrat-e-'bismil' ye achchhī dil ko sūjhī dil-lagī
kar diyā shamshīr-e-qātil kā tamannā.ī mujhe

ishva o ġhamza o andāz o adā haiñ qātil
kishvar-e-dil pe mire lashkar-e-jarrār girā

charāġhoñ ko zarā sā hausla do
havā kuchh aur qātil ho ga.ī hai

qātil tū ghar pe kaise kahūñ maiñ burā bhalā
izzat-ma.āb hai mirā mehmān bhī to hai

dushman-e-jāñ haiñ sabhī saare ke saare qātil
tū bhī is bhiiḌ meñ kuchh der Thahar jā ai dil

koī nazar ho yā ḳhanjar ho
qātil to qātil hotā hai