Tags-Peace

mulk meñ mere amn kī ḳhvāhish jān-e-man
bakrī jaise biich meñ sau qassāboñ ke

ham amn chāhte haiñ magar zulm ke ḳhilāf
gar jañg lāzmī hai to phir jañg hī sahī

ba-nām-e-amn-o-amāñ kaun maarā jā.egā
na jaane aaj yahāñ kaun maarā jā.egā

ik nayā paġhambar-e-amn-o-amāñ paidā huā
kārvāñ meñ ik amīr-e-kārvāñ paidā huā

tūfān zalzala kabhī sailāb aa gayā
pur-amn to ḳhudā bhī hukūmat na kar sake

ham duā amn kī māñgte haiñ magar
aap bhī apnī paa.el ko samjhā.iyo

har taraf bahne lage amn-o-sukūñ kā dariyā
kaash aa jaa.e buzurgoñ kā samay guzrā huā

parvāz meñ thā amn kā ma.asūm parinda
sunte haiñ ki be-chāra shajar tak nahīñ pahuñchā

ā.īna-e-ḳhulūs-o-mohabbat yahāñ the raam
amn aur shāñtī kī zamānat yahāñ the raam

dekhte sab haiñ magar band zabāñ rakhte haiñ
is tarah shahr meñ ham amn-o-amāñ rakhte haiñ

shoḳhī shabāb husn tabassum hayā ke saath
dil le liyā hai aap ne kis kis adā ke saath

pūchhe haqīqat ek ne jo amn-e-rāh kī
to bole sar jhukā ke bachā vo madāriye

jahāñ nifāq ke sho.ale mileñ bujhā ke chalo
charāġh amn-o-mohabbat kā tum jalā ke chalo

amn parchār talak Thiik sahī lekin amn
tum ko lagtā hai ki hogā nahīñ hone vaalā

hai vahshatoñ kā ye daur kaisā kyoñ dahshateñ sar uThā rahī haiñ
kahāñ se le aa.eñ DhūñD kar ham vahī jo amn-o-amāñ thā pahle

sab se pur-amn vāqi.a ye hai
aadmī aadmī ko bhuul gayā

amn-e-ālam kī ḳhātir
jañg yugoñ se jaarī hai

kuchh peḌ haiñ nafrat kī havā jin se baḌhī hai
ye baaġh magar ab bhī aman DhūñD rahā hai

amn thā pyaar thā mohabbat thā
rañg thā nuur thā navā thā firāq

julūs-e-amn jab niklā to ham ne 'shauq' ye dekhā
kahīñ ḳhanjar nikal aa.e kahīñ neze nikal aa.e