Tags-Partition

taqsīm huuñ majbūran maiñ kitne hī ḳhānoñ meñ
duniyā ne magar kyā kyā ilzām tarāshe haiñ

bichhaḌte vaqt vo taqsīm kar gayā mausam
bahār us kī taraf hai ḳhizāñ hamārī taraf

ye tum hañs hañs ke bāteñ kar rahe ho
ki taqsīm-e-jarāhat ho rahī hai

fasādāt dekhe the taqsīm ke vaqt tum ne
havā meñ uchhalte hue DanThaloñ kī tarah shīr-ḳhvāroñ ko dekhā thā kaTte

taqsīm tazkire ko maiñ kaise raqam karūñ
tanhā.iyoñ meñ baiThūñ ki āñkhoñ ko nam karūñ

bandar baañT rahā thā phaliyāñ bolā gidh ho ke barham
''ye achchhī taqsīm hai terī ḳhud le ziyāda ham ko kam''

us ke farmānoñ kī elānoñ kī tāzīm karo
raakh taqsīm kī armān bhī taqsīm karo

jis ne insānoñ kī taqsīm ke sadme jhele
phir bhī insāñ kī uḳhuvvat kā parastār rahā

na aag lagtī na taqsīm-e-jism-o-jāñ hotī
fuġhāñ ki shahr-e-sitam par nahīñ ijāra mirā

ghar kī taqsīm se hal koī nahīñ niklegā
mas.ale aur khaḌe hote haiñ dīvār ke saath

sab ke sab ḳhvāb maiñ taqsīm nahīñ kar detā
ek do ḳhvāb pas-andāz bhī kar letā huuñ

ujālā chhin rahā hai raushnī taqsīm hotī hai
tirī āvāz hai yā zindagī taqsīm hotī hai

qayāmat hai diloñ ke darmiyāñ dīvār uThāte ho
diloñ ke dard kī hamsā.egī taqsīm hotī hai

yaqīñ aayā tire shādāb paikar kī khanak sun kar
badan ke zāviyoñ meñ yuuñ hañsī taqsīm hotī hai

ḳhushī ke naam par āñkhoñ meñ aañsū aa hī jaate haiñ
ba-qadr-e-ġham mohabbat meñ ḳhushī taqsīm hotī hai

yahī vo moḌ hai apne parā.e chhūT jaate haiñ
qarīb-e-kū-e-jānāñ gumrahī taqsīm hotī hai

sar-e-pahnā-e-naġhma 'shāz' kuchh sho.ala sā uThtā hai
sunā hai daulat-e-paiġhambarī taqsīm hotī hai

kabhī reg-e-ravāñ se pyaas bujh jaatī hai rahrav kī
kabhī dariyā ke hāthoñ tishnagī taqsīm hotī hai

vahīñ kal vaqt ne khaa.ī thī Thokar yaad hai ab tak
vo pech-o-ḳham jahāñ terī galī taqsīm hotī hai

manzil to ḳhush-nasīboñ meñ taqsīm ho chukī
kuchh ḳhush-ḳhayāl log abhī tak safar meñ haiñ