Tags-Mashwara

ham baḌe ahl-e-ḳhirad bante the ye kyā ho gayā
aql kā har mashvara dīvāna-pan lagne lagā

mujh se ye bojh nahīñ uTh saktā
mashvara koī mujhe mat diije

aql kī bartarī dil ne maanī to kyā us ne chāhā kabhī aql kā mashvara
dil ko jis tarah chalnā thā chaltā rahā aql har gaam par haath maltī rahī

raḳhsh-e-abad-ḳhirām kī thamtī nahīñ haiñ bijliyāñ
sub.h-e-azal-nizhād se karnā hai mashvara mujhe

havā se dostī jis ko thā mashvara merā
usī charāġh kī lau se maiñ aaj Dar bhī gayā

dil ko mahv-e-ġham-e-dildār kiye baiThe haiñ
riñd bante haiñ magar zahr piye baiThe haiñ

ġhalat nahīñ mujhe marne kā mashvara us kā
vo merā dard samajhtā hai kyā kiyā jaa.e

tumheñ ai 'ḳhālid'-e-irfān merā mashvara hai
ġhazal kahnā magar har jā ġhazal-ḳhvānī se bachnā

kyuuñ na duuñ maiñ dūsroñ ko ratjage kā mashvara
maiñ ki ḳhud nādim huuñ apne ḳhvāb kī ta.abīr par

is mashvara ke saath ki charchā na chāhiye
dil kah rahā hai un pe bharosa na chāhiye

kisī ko denā ye mashvara ki vo dukh bichhaḌne kā bhuul jaa.e
aur aise lamhe meñ apne aañsū chhupā ke rakhnā kamāl ye hai

sach to boloñ magar salīqe se
roz ye mashvara milā hai mujhe

ḳhudā se mashvara māñgā hai tere baare meñ
koī ishāra to ab hogā istiḳhāre meñ

detā hai ab yahī dil-e-shorīda mashvara
jiine se tañg ho to miyāñ mar ke dekh lo

mashvara kis ne diyā thā ki masīhā.ī kar
zaḳhm khāne haiñ to logoñ se shanāsā.ī kar

mujhe apne baare meñ kyā mashvara ho
maiñ apne liye kab akelā rahā huuñ

lahū se byaaj chukānā paḌegā ab tujh ko
diyā ye mashvara kis ne ki jaañ udhārī rakh

ḳhair-ḳhvāhoñ kā mashvara ye hai
Thokareñ khaao aur salām karo

dekhnā ye hai ki jañgal ko chalāne ke liye
mashvara rīchh se aur chiil se hogā ki nahīñ

jāntā huuñ kaun kyā hai aap kyuuñ deñ mashvara
maiñ luTeroñ se bhī vāqif aur rahbar-āshnā