Tags-Manzil

misāl-e-zīna-e-manzil ba-kār-e-shauq aayā
har ik maqām ki TuuTī jahāñ jahāñ pe kamand

mil bhī saktā hai hameñ manzil-e-hastī kā surāġh
vaqt ne paañv meñ zanjīr na pahnā.ī ho

ek manzil hai go mirī un kī
rasta lekin judā judā hogā

pata andesha-e-sālik ne paayā manzil-e-dil kā
tū palTā lā-makāñ se āsmāñ-dar-āsmāñ ho kar

kaThin thā rāsta dushvār thī har ik manzil
koī dikhā.e usī raah se guzar ke mujhe

añdherā bahut aur lambā safar hai
hai manzil kahāñ rahnumā jāntā hai

hazār manzil-e-rāh-e-junūñ tamām huī
hazār manzil-e-ahl-e-junūñ nigāh meñ hai

maiñ sarāpā aarzū huuñ ārzū-e-nā-tamām
mujh ko har manzil se aage kī ḳhabar detā hai vo

chal paḌe jab jānib-e-manzil to phir ai ham-safar
kyā safar kī mushkileñ kyā dūriyāñ kaisī thakan

ham bhī manzil pe pahuñch jā.eñge marte khapte
qāfila yāroñ kā jaatā hai agar jaane do

as.hāb-e-ḳhās gird the anjum kī tarah sab
tābāñ thā biich meñ vo mah-e-hāshmī-laqab

hazāroñ manzileñ phir bhī mirī manzil hai tū hī tū
mohabbat ke safar kā āḳhirī hāsil hai tū hī tū

hazār manzil-e-nau yak farāġh-e-gumshudagī
ma.āl-e-hausla-e-justujū samajhte haiñ

jab nigāh-e-talab mo'atabar ho ga.ī
manzil-e-shauq dushvār-tar ho ga.ī

sunā hai ek ajnabī sī manzil ko uTh rahe haiñ qadam tumhāre
burā na maano to rahnumā.ī ko maiñ sar-e-rahguzār aa.uuñ

talāsh-e-manzil-e-maqsad kī gardish uTh nahīñ saktī
kamar khole hue raste meñ ham rahzan ke baiThe haiñ

shukriya ai qabr tak pahuñchāne vaalo shukriya
ab akele hī chale jā.eñge is manzil se ham

'vasfī' mirī hayāt ne manzil ko pā liyā
kuchh din guzār aayā jo ik pārsā ke saath

jab maiñ hī nahīñ yaad rafīqān-e-safar ko
hairāñ huuñ ki manzil unheñ kyā yaad rahegī

manzil-e-ulfat meñ rakkheñ to qadam
rustam-o-suhrāb kā kyā gurda hai