Tags-Khwab

ham to bedār hue ḳhvāb se apne lekin
vo bhī ḳhvāboñ meñ pareshāñ na huā thā so huā

bajā ki aañkh meñ nīndoñ ke silsile bhī nahīñ
shikast-e-ḳhvāb ke ab mujh meñ hausle bhī nahīñ

jilau meñ le ke chaleñ saare nā-tamām se ḳhvāb
na jaane kis jagah umr-e-gurez-pā mil jaa.e

alassabāh ki duniyā thī mahv-e-ḳhvāb abhī
chhupā thā hujra-e-mashriq meñ āftāb abhī

jin kī ta.abīr se āñkheñ nam haiñ
phir vahī ḳhvāb-e-tarab yaad aayā

kho gayā jo bhī zād-e-safar paas thā
ḳhvāb oḌhe hue ik yaqīñ rah gayā

noch kar pheñk diye aap hī ḳhvāb āñkhoñ se
is dabī shaad ko nāshād bhī ḳhud maiñ ne kiyā

jaane kahāñ the aur chale the kahāñ se ham
bedār ho ga.e kisī ḳhvāb-e-girāñ se ham

phirāyā dar-ba-dar be-kal jahāñ meñ ḳhvāb-o-ḳhvāhish ne
musalsal hai sukūñ armān-o-hasrat ko miTā.e huuñ

raat ko ḳhvāb ho ga.ī din ko ḳhayāl ho ga.ī
apne liye to zindagī ek savāl ho ga.ī

titlī ke ta.āqub meñ koī phuul sā bachcha
aisā hī koī ḳhvāb hamārā bhī kabhī thā

aa.e bhī vo chale bhī ga.e yaañ kise ḳhabar
hairāñ huuñ maiñ ḳhayāl hai ye yā ki ḳhvāb hai

dīda-e-ḳhvāb ko ummīd-e-mulāqāt na de
kis tarah apne hī ḳhvāboñ ko sisaktā dekhūñ

ḳhvāb meñ kyuuñ dikhā.ī dete haiñ
bolte peḌ jāgtā jañgal

fasīl-e-ḳhvāb pe sīḌhī lagāne vaalā huuñ
maiñ ek raaz se parda uThāne vaalā huuñ

ham yūñhī ḳhvāb bunte rahte haiñ
khel saarā qazā kā hotā hai

hurūf ḳhālī sadaf aur nisāb zaḳhmoñ ke
varaq varaq pe haiñ tahrīr ḳhvāb zaḳhmoñ ke

ye nīm-ḳhvāb ghaas par udaas udaas naqsh-e-pā
kuchal rahā hai shabnamī libās kī hayāt ko

majāz kaisā kahāñ haqīqat abhī tujhe kuchh ḳhabar nahīñ hai
ye sab hai ik ḳhvāb kī sī hālat jo dekhtā hai sahar nahīñ hai

na koī aag hai mujh meñ na raushnī na dhuāñ
kisī ke ḳhvāb meñ jaltā huā diyā huuñ maiñ