jaane kahāñ the aur chale the kahāñ se ham
bedār ho ga.e kisī ḳhvāb-e-girāñ se ham
ai nau-bahār-e-nāz tirī nik.hatoñ kī ḳhair
dāman jhaTak ke nikle tire gulsitāñ se ham
pindār-e-āshiqī kī amānat hai āh-e-sard
ye tiir aaj chhoḌ rahe haiñ kamāñ se ham
aao ġhubār-e-rāh meñ DhūñDeñ shamīm-e-nāz
aao ḳhabar bahār kī pūchheñ ḳhizāñ se ham
āḳhir duā kareñ bhī to kis mudda.ā ke saath
kaise zamīñ kī baat kaheñ āsmāñ se ham