Tags-Khudi

vahdat kā vo surūr thā saaqī ke jaam meñ
piine ko ham ne pī hai magar be-ḳhudī nahīñ

sāz-e-āhañg-e-junūñ tār-e-rag-e-jāñ ke liye
be-ḳhudī shauq kī be-sar-o-sāmāñ ke liye

the be-ḳhudī meñ paas vo hosh aa.ī to ga.e
chūke ġhazab hī hosh meñ aanā yahāñ na thā

na hosh bā-ḳhabar is se na be-ḳhudī āgāh
maiñ kis se pūchhūñ tire shahr-e-iltifāt kī raah

shanāḳht jis se zamāne meñ aadmī kī hai
ye iltijā hai ki tū mujh ko vo ḳhudī denā

junūn-e-shauq-e-mohabbat kī āgahī denā
ḳhudī bhī jis pe ho qurbāñ vo be-ḳhudī denā

ġhurūr bhī jo karūñ maiñ to ājizī ho jaa.e
ḳhudī meñ lutf vo aa.e ki be-ḳhudī ho jaa.e

kare kyā sāz-e-bīnish vo shahīd-e-dard-āgāhī
jise mū-e-dimāġh-e-be-ḳhudī ḳhvāb-e-zuleḳhā ho

vaañ sarguzisht-e-dushman vo kah rahe haiñ muñh par
yaañ be-ḳhudī hai is par kyā rāz-dār haiñ ham

aur koī gunāh yaad nahīñ
sajda-e-be-ḳhudī ke mujrim haiñ

lab pe ḳhushkī ruḳh pe zardī aañkh sharmā.ī huī
chashm o abrū meñ ḳhudī kī aag kajlā.ī huī

har ek dar pe jabīñ Tekte ye sajda-guzār
ḳhudā kī khoj meñ nikle the aur ḳhudī se ga.e

ham aa.eñ aap meñ yā-rab vo jis dam aa.eñ bālīñ par
hujūm-e-rañj-e-tanhā.ī se hai ye be-ḳhudī achchhī

yaad aayā kuchh girā thā TuuT kar
be-ḳhudī meñ ḳhud se kal Takrā ga.e

jab na qasd-e-ḳhudī ke darīche khule
ahl-e-dil ho liye be-ḳhudī kī taraf

der tak diid ke maze luuTe
ḳhuub niklī ye be-ḳhudī se ġharaz

jis ne 'āmir' matā-e-ḳhudī bech dī sach ye hai ismat-e-zindagī bech dī
sar jhukāne se behtar hai sar dījiye bhiik lene se behtar hai mar jā.iye

ye be-ḳhudī ye laboñ kī hañsī mubārak ho
tumheñ ye sālgirah kī ḳhushī mubārak ho

tumhārī yaad ne kī rahnumā.ī
ḳhayāl aayā mujhe jab be-ḳhudī kā

pahuñchā hī diyā kisī galī tak
allāh-re zor be-ḳhudī kā