Tags-Khoon

dil kī ālūdgī-e-zaḳhm baḌhī jaatī hai
saañs letā huuñ to ab ḳhuun kī bū aatī hai

ḳhūn-e-dil piitā hai aur hai jāntā
nemat-e-uzmā use mehmān-e-ishq

zab.h ke vaqt bahut saaf rahā thā ye to
de uThā ḳhuun dam-e-hashr ye dāman kaisā

lāl-e-lab kā tire bosa to maiñ letā huuñ magar
Dar ye hai ḳhūn-e-jigar baad meñ piinā hogā

jarīda meñ rah-e-pur-ḳhūn-e-ishq se guzrā
jaras se qāfile meñ bahs-e-nāla kyā kartā

ḳhūn-e-dil hijr meñ piitā huuñ to ġham khātā huuñ
ki davā piite haiñ bīmār ġhizā se pahle

chehre pe ek ke bhī na paayā vafā kā rañg
ahl-e-jahāñ kā ḳhuun huā sar-ba-sar saped

jism ke andar jo sūraj tap rahā hai
ḳhuun ban jaa.e to phir ThanDā kareñge

dhuāñ nikālūñ maiñ huqqe kā ḳhūn-e-jām piyūñ
tire haiñ lab se donoñ mere rū-ba-rū gustāḳh

ḳhudā-e-bartar tirī zamīñ par zamīñ kī ḳhātir ye jañg kyuuñ hai
har ek fat.h-o-zafar ke dāman pe ḳhūn-e-insān kā rañg kyuuñ hai

ḳhūn-e-gulshan hai pas-e-parda-e-ailān-e-bahār
dekhnā ġhuncha-e-nauras meñ sharārā to nahīñ

gul khilāte haiñ nayā roz ye rishte-nāte
roz hī ḳhuun kā ik rañg nayā dekhtā huuñ

ḳhuun jab ashk meñ Dhaltā hai ġhazal hotī hai
jab bhī dil rañg badaltā hai ġhazal hotī hai

ashkoñ ke badle ḳhuun ke qatre Tapakte haiñ
battī hamāre zaḳhm kī raushan kañval meñ hai

kaun athā meñ utre merī kis pe khule hañgām mirā
ashk se kaise bhāñp sakoge ḳhuun meñ hai kohrām mirā

dekh us ke hinā kuuñ mardum-e-chashm
ḳhūn-e-dil suuñ ḳhizāb karte haiñ

ishq-e-butāñ se haath uThā apnī ḳhudī meñ Duub jā
naqsh o nigār-e-dair meñ ḳhūn-e-jigar na kar talaf

barbariyat kī jahāñ meñ garm-bāzārī huī
ādmiyat kī ragoñ meñ ḳhuun ThanDā ho gayā

hazāroñ mard-e-maidāñ ḳhuun paanī ek karte haiñ
rah-e-mushkil-talab se tab kahīñ āsāñ guzarte haiñ

badalnī chāhiye thī ḳhaak kī tāsīr 'shahzād'
hamāre ḳhuun ko talvār honā chāhiye thā