apnī pursish jo ho arbāb-e-vafā se pahle
māñgiye daulat-e-dīdār ḳhudā se pahle
jhuk gayā vo shah-e-husn aa ke gadā se pahle
ḳham huī zulf-e-dotā qadd-e-dotā se pahle
chashm-e-mushtāq laḌī chashm-e-dotā se pahle
sāmnā hogā balāoñ kā balā se pahle
tū har ik asfal-o-a.alā kā hai razzāq karīm
ustuḳhvāñ sag ko pahuñchtā hai humā se pahle
ba.ad-hū chehra-e-jānāñ ke muqābil ai charḳh
chāñd muñh us ke milā.e kaf-e-pā se pahle
ba.ad bhī zikr kiyā ho jo vafādārī kā
sar qalam kījiye shamshīr-e-jafā se pahle
ḳhūn-e-dil hijr meñ piitā huuñ to ġham khātā huuñ
ki davā piite haiñ bīmār ġhizā se pahle
shauq-e-gul sūrat-e-bulbul ḳhatar-e-gulchīñ hai
sub.h-dam baaġh meñ jaatā huuñ sabā se pahle
ġhaflat-e-qalb se zuhhād paḌheñ ba.ad-e-namāz
barahman sajda kare but ko ḳhudā se pahle
taḳht-e-tābūt ravāñ bhī hai ajab taḳht-e-ravāñ
shaah takiye meñ pahuñchtā hai gadā se pahle
misl-e-mūsā mujhe ġhash aa.e na ho tum ko hijāb
va.ada-e-vasl jo iifā ho hayā se pahle
shoḳh ne mehñdī malī haath meñ maiñ qatl huā
rañg lā.egā lahū rañg-e-hinā se pahle
pā-e-qātil jo pas-e-marg bhī Thokar maare
nazr sar kījiye taslīm-o-razā se pahle
rū-ba-rū tere huā asfal-o-a.alā kā zuhūr
ilm-e-ḳhāliq meñ tū thā arz-o-samā se pahle
kyā bayāñ rutba-e-a.alā-e-alī ko maiñ karūñ
sair-e-me.arāj kī mahbūb-e-ḳhudā se pahle
dast-gīrī jo hai bande kī ḳhudā ko manzūr
uThte haiñ dast-e-duā 'arsh' duā se pahle