Tags-Hawa

zamāna mujh se judā ho gayā zamāna huā
rahā hai ab to bichhaḌne ko mujh se tū baaqī

havā na jaane kahāñ le ga.ī vo tiir ki jo
nishāne par bhī na thā aur kamān meñ bhī na thā

ik shaffāf tabī.at vaalā sahrā.ī
shahr meñ rah kar kis darja chālāk huā

yahīñ gum huā thā ka.ī baar maiñ
ye rasta hai sab merā dekhā huā

dil-e-girafta ke sab pech-o-tāb khol ke dekh
havā kā zor muhīt-e-hubāb khol ke dekh

kahīñ to dasht meñ Thahregī mauj-e-āb-e-gurez
ravāñ huā hai to rāz-e-sarāb khol ke dekh

apne bachchoñ kī taraf ġhaur se jab bhī dekhā
kitne hī rañgoñ meñ bikhrā huā paayā ḳhud ko

nuur tū mujh se farāvāñ huā mahfil mahfil
ġham nahīñ sham-e-sifat maiñ ne jalāyā ḳhud ko

bigḌā huā hai hijr meñ kuchh vaqt kā nizām
lamha guzar na paayā ki ik saal ho gayā

vo jurm bhī ik azmat-e-kirdār hai jis ne
TuuTā huā ik rishta-e-dil joḌ diyā hai

kabhī samt-e-ġhaib siiñ kyā huā ki chaman zuhūr kā jal gayā
magar ek shāḳh-e-nihāl-e-ġham jise dil kaho so harī rahī

harīs-e-shab kabhī āsūda-e-sahar na huā
ye kārobār-e-havas hai jo muḳhtasar na huā

kisī se ho na sakā ḳhud-gazīdgī kā ilaaj
ye zahr vo hai ki tiryāk kā asar na huā

sabhoñ ko bhuul gayā kārobār-e-hastī meñ
maiñ apne aap se ik pal bhī be-ḳhabar na huā

jo aaj tak mire lams-e-qalam se hai mahrūm
vo harf harf to hai harf-e-mo'tabar na huā

ajiib baat hai patthar pe rah gayā mahfūz
vo naqsh-e-pā jo kabhī naqsh-e-rahguzar na huā

thakan se chuur the rukte to phir qayāmat thī
bhalā huā jo kahīñ sāya-e-shajar na huā

vo aadmī jo maqām-e-bashar samajh na sakā
tamām umr farishta rahā bashar na huā

ḳhudā-parastī nahīñ hai to ḳhud-parastī sahī
magar jabīñ ko mirī zauq-e-sañg-e-dar na huā

use ḳhayāl thā tashkīl-e-jāda-e-nau kā
kisī ke saath vo āmāda-e-safar na huā