Tags-Hawa

zaḳhm kab kā thā dard uThā hai ab
us ke jaane kā dukh huā hai ab

mirā haal pūchh ke ham-nashīñ mire soz-e-dil ko havā na de
bas yahī duā maiñ karūñ huuñ ab ki ye ġham kisī ko ḳhudā na de

koī kundan huā to koī ko.elā
ek maiñ hī thā jo adh-jalā rah gayā

ḳhvāb-e-ārām meñ sotā thā vo gul qahr huā
ai nasīm-e-saharī kis ko jagāyā tū ne

vo havā-ḳhvāh-e-chaman huuñ ki chaman meñ har sub.h
pahle maiñ aatā huuñ aur bād-e-sabā mere ba.ad

phaaḌ Dālīñ haiñ guloñ ne jo qabā.eñ apnī
baaġh meñ aaj gayā thā ye havā khāne kaun

har shaḳhs tere shahr meñ mujrim banā huā
phirtā hai DhūñDhtā huā rishta najāt kā

chār-sū dasht meñ phailā hai udāsī kā dhuāñ
phuul sahme haiñ havā Thahrī hai manzar chup haiñ

asar kar ke āh-e-rasā phir ga.ī
huā saaf matl.a havā phir ga.ī

savārī tirī aa ke kyā phir ga.ī
idhar ko udhar kī havā phir ga.ī

ye sach hai us se bichhaḌ kar mujhe zamāna huā
magar vo lauTnā chāhe to phir zamāna bhī kyā

zarā sī der jo ḳhauf-e-davām ḳhatm huā
ye mat samajh ki ye hū kā maqām ḳhatm huā

kahāñ gayā jaras-e-karbalā bulā ke mujhe
ki rāste meñ mirā ghar tamām ḳhatm huā

na terī pyaas ne dariyāoñ se hī bai.at kī
na pāniyoñ pe likhā terā naam ḳhatm huā

daraḳht saare sameTe hue haiñ shāḳh-e-ḳhulūs
chalo ki pahle safar kā qayām ḳhatm huā

chunegā soḳhta ḳhemoñ kī raakh aur koī
lagā ke aag havā kā to kaam ḳhatm huā

sar-e-ufuq koī taarā na be-navā koī chīḳh
ye kin tabāhiyoñ pe rañj-shām ḳhatm huā

dhuāñ havā meñ uḌ gayā 'shumā.ila'
suḳhan tirā bujhā huā ḳhayāl hai

shāḳh jhulsī huī thī aur us par
ek sahmā huā parinda thā

gardishoñ ke liye ab tak na ye mumkin na huā
kisī sūrat mire mehvar se haTā leñ mujh ko