Tags-Hawa

havā chaltī hai yā gaatā hai koī
vo kaun aisā hai kis ke sāmne huuñ

ġhusse meñ dauḌte haiñ Trak bhī lade hue
maiñ bhī bharā huā huuñ bahut intiqām se

zarra zarra bikhar kar bhī āḳhir tujhe ḳhatm honā to hai
kyuuñ na yak-dam havā meñ uḌā.ūñ tujhe muḳhtasar zindagī

dastāvezī process mukammal huā
kāhinoñ ġhaib-dānoñ kī fitnagarī ke zamāne fanā ho ga.e

tafrīh na kyūñkar ho havā aa nahīñ saktī
goyā dar o dīvār nasheman hai hamārā

añgrezī guftugū kā baḌā fā.eda huā
chhe saat chāñd lag ga.e mere vaqār meñ

na pūchh ai ham-nashīñ college meñ aa kar ham ne kyā dekhā
zamīñ badlī huī dekhī falak badlā huā dekhā

huā raushan dam-e-ḳhurshīd se phir rañg paanī kā
damak uTThā hai mere aa.ine par zañg paanī kā

bahut hī yaad aatā hai koī bachhḌā huā mujh ko
kabhī jab sāmnā kartā huuñ shoḳh-o-shañg paanī kā

mirā beḌī pahannā thā ki duniyā kī havā badlī
zamāne kī bahāreñ phaT paḌīñ aa ke gulistāñ par

pahle to miTTī kā aur paanī kā andāza huā
phir kahīñ apnī pareshānī kā andāza huā

ai mohabbat tere dukh se dostī āsāñ na thī
tujh sā ho kar terī vīrānī kā andāza huā

umr bhar ham ne fanā ke tajrbe ḳhud par kiye
umr bhar meñ ālam-e-fānī kā andāza huā

ik zamāne tak badan bin ḳhvāb bin ādāb the
phir āchānak apnī uryānī kā andāza huā

tere hāthoñ jal uThe ham tere hāthoñ jal bujhe
hote hote aag aur paanī kā andāza huā

log merī band āñkhoñ meñ se guzre tab unheñ
apnī apnī ḳhvāb-sāmānī kā andāza havā

ek gherā vaqt kā hai dūsrā nā-vaqt kā
ḳhud-nigar kuchh apnī nigarānī kā andāza huā

sūrateñ bigḌīñ to apnī hālatoñ meñ aa.e ham
aa.ina TuuTā to hairānī kā andāza huā

raat ik dahlīz aisī aa ga.ī thī ḳhvāb meñ
raat kuchh kuchh apnī peshānī kā andāza huā

aaj bhī raqs hī karnā hai ishāroñ pe hameñ
fā.eda kuchh na huā chaak badal jaane se