Tags-Hawa

zindagī ne kyā diyā thā maut ne kyā le liyā
ḳhaak se paidā huā thā ḳhaak kī sohbat meñ huuñ

maiñ us daraḳht kā bas āḳhirī hī patta thā
jise hamesha havā ke ḳhilāf laḌnā thā

tamām-umr vo aayā nahīñ zamīñ pe kabhī
havā meñ us ne jo sikka jo kabhī uchhālā thā

pata karo ki abhī vo baḌā huā ki nahīñ
baḌe daraḳht ke nīche jo nanhā paudā thā

mujh ko hālāt meñ uljhā huā rahne de yūñhī
maiñ tirī zulf nahīñ huuñ jo sañvar jā.ūñgā

sab ke hī sīnoñ meñ hai phailā huā sāñsoñ kā habs
koī shahr aisā nahīñ jis kī fazā bojhal na ho

huā hai vo shauq-e-dīd-bāzī ki samjheñ is ko bhī sarfarāzī
bulā.eñ āñkheñ vo phoḌne ko to nazr karne nazar ko chaliye

charāġh-e-bazm-e-ḳhudā huā hai ḳhudā ne mahbūb use kahā hai
ye shaam se lau lagī hai dil ko ki dekhne us bashar ko chaliye

kyā sochnā ki shauq kā anjām kyā huā
jab iḳhtiyār pesha-e-farhād kar liyā

raat ik shaḳhs bahut yaad aayā
jis ghaḌī chāñd numūdār huā

khiḌkiyāñ kholo ki dar aa.e koī mauj-e-havā
raakh kā Dher haiñ kuchh log tarab-ḳhānoñ meñ

shaam Dhale us bazm-e-tarab meñ merā jaanā ḳhuub huā
mujh ko achānak sāmne pā kar vo kitnā mahjūb huā

dasht-e-sitam meñ kitnī salībeñ istāda thiiñ chār-taraf
shaah ke haath pe bai.at kar lī koī na yaañ maslūb huā

rusvā.ī ke saa.e hamesha pīchhā karte rahte haiñ
mujh se gurezāñ ho kar bhī vo mujh se hī mansūb huā

kūcha-e-yār meñ jaanā ho to tark-e-anā hai pahlā qadam
ishq kisī se kyā kartā vo jo apnā mahbūb huā

ujḌī jab se mahfil-e-yārāñ taur badal ga.e jiine ke
zaḳhm mirā pairāhan Thahrā dard mirā uslūb huā

ahd-e-nau kī ījādoñ se lazzat-e-nāma-barī bhī ga.ī
shīshe par kuchh harf likhe haiñ ye kaisā maktūb huā

apne aib pe chashm-e-zamāna mushkil hī se jaatī hai
be-chehra the dekhne vaale ā.īna ma.atūb huā

rah ga.e kuchh yādoñ ke saa.e kuchh lafzoñ kī raushaniyāñ
āḳhir merī umr kā sūraj Dhalte Dhalte ġhurūb huā

vajūd jis ko kisī mo'tabar shajar ne diyā
havā kī zad meñ bhī tinkā vo be-sahārā nahīñ