Tags-Hawa

manziloñ ke ba.ad dil us raaz kā mahram huā
dar-haqīqat vo ḳhushī thī naam jis kā ġham huā

pesh-e-ā.īna sañvarne meñ badal kar zāviye
tum ne jis aalam ko dekhā ik alag aalam huā

un ke gesū haiñ zamāne par mukammal tabsira
bārhā ārāsta ho kar jahāñ barham huā

jazba-e-hamdardī-e-ulfat tirā mashkūr huuñ
jab kisī kī aañkh bhīgī merā dāman nam huā

chashm-e-sāqī se girā jaatā hai zarf-e-mai-kashāñ
toḌ deñ sāġhar jinheñ ehsās-e-besh-o-kam huā

kitne ḳhāke the hayāt-e-kāmrāñ ke zehn meñ
dil to is aalam meñ bhī masrūr thā jab ġham huā

shor-e-tahsīn-e-suḳhan kī rau bahāne aa.ī thī
zeb-e-lab 'mānī' ke man aanam ki man dānam huā

vo sāmne thā phir bhī kahāñ sāmnā huā
rahtā hai apne nuur meñ sūraj chhupā huā

ai raushnī kī lahr kabhī to palaT ke aa
tujh ko bulā rahā hai darīcha khulā huā

sairāb kis tarah ho zamīñ duur duur kī
sāhil ne hai nadī ko muqayyad kiyā huā

ai dost chashm-e-shauq ne dekhā hai bār-hā
bijlī se terā naam ghaTā par likhā huā

pahchānte nahīñ use mahfil meñ dost bhī
chehra ho jis kā gard-e-alam se aTā huā

is daur meñ ḳhulūs kā kyā kaam ai 'shakeb'
kyuuñ kar chale bisāt pe mohra piTā huā

aa dekh ki zālim furqat meñ kyā haal mirā behāl huā
aahoñ se sharāre jhaḌte haiñ āñkhoñ se dariyā bahte haiñ

council meñ nukta-chīnoñ kī Tolī bahut piTī
achchhā huā sambhal ga.ī ab university

duā.eñ māñgīñ haiñ muddatoñ tak jhukā ke sar haath uThā uThā kar
huā huuñ tab maiñ butoñ kā banda ḳhudā ḳhudā kar ḳhudā ḳhudā kar

gale hazāroñ ne apne kaaTe hazāroñ be-vaj.h ho ga.e ḳhuun
bahut huā phir tū yaar nādim kaf-e-hinā.ī dikhā dikhā kar

zar-e-sarishk fazā meñ uchhāltā huā maiñ
bikhar chalā huuñ ḳhushī ko sambhāltā huā maiñ

abhī to pahle paroñ kā bhī qarz hai mujh par
jhijak rahā huuñ na.e par nikāltā huā maiñ

kisī jazīra-e-pur-amn kī talāsh meñ huuñ
ḳhud apnī raakh samundar meñ Dāltā huā maiñ