Tags-Hawa

na jaane log Thaharte haiñ vaqt-e-shām kahāñ
hameñ to ghar meñ bhī rukne kā hauslā na huā

huā huuñ marg ke nazdīk ġham se
ḳhudā jaane ye kis din duur hogā

patthar na pheñk dekh zarā ehtiyāt kar
hai sat.h-e-āb par koī chehra banā huā

sahrā se varna apnā ilāqa nahīñ hai kuchh
āshuftagī-e-sar kī havā hai yahāñ bahut

banā huā hai hamārā kasī bahāne se
bichhaḌ na jaa.e kaheñ dost āzmāne se

kis ajab sā.at-e-nāyāb meñ aayā huā huuñ
tujh se milne maiñ tire ḳhvāb meñ aayā huā huuñ

aa girā zinda shamshān meñ lakḌiyoñ kā dhuāñ dekh kar
ik musāfir parinda ka.ī sard rātoñ kā maarā huā

maiñ to gayā huā thā hazāroñ naqāb meñ
lekin akelā dekh ke pahchān se ga.e

gulāb qīmat-e-shaguft shaam tak chukā sake
adā vo dhuup ko huā jo qarz bhī sabā kā thā

bikhar gayā hai phuul to hamīñ se pūchh-gachh huī
hisāb bāġhbāñ se hai kiyā-dharā havā kā thā

ba-juz us ke 'ehsān' ko kyā samajhiye
bahāroñ meñ khoyā huā ik sharābī

ham insānoñ se to ye sañg-o-ḳhisht-e-bām-o-dar achchhe
musāfir kab huā ghar se ravāna yaad rakhte haiñ

mirī ġhairat-e-hama-gīr ne mujhe tere dar se uThā diyā
kuchh anā kā zor jo kam huā to ḳhabar huī tū ḳhudā sā hai

amīr-e-shahr kī sohbat ke faiz se 'aḳhtar'
janāb-e-shaiḳh ab ūñchī havā meñ rahte haiñ

pashemān tauba se hogā adam meñ
ki ġhāfil chalā shaiḳh lutf-e-havā se

tabīb subuk-e-aql hargiz na samjhā
huā dard-e-ishq aah duunā davā se

dast-e-junūñ bhī tañg huā dasht-e-ishq meñ
ab chaak kyā karūñ ki garebān hī nahīñ

yahīñ thā baiThā huā darmiyāñ kahāñ gayā maiñ
ki mil rahā nahīñ apnā nishāñ kahāñ gayā maiñ

maiñ kab nahīñ thā akārat magar rahā hāzir
huā huuñ ab ke ajab rā.egāñ kahāñ gayā maiñ

uThā ke le gayā dāroġha-e-fanā shāyad
khulā huā hai dar-e-ḳhāk-dāñ kahāñ gayā maiñ