Tags-Hawa

aur sī aur huā hai sājan ziist kā har mafhūm
aur sī aur huī hai merī sochoñ kī parvāz

soch meñ Duubā huā huuñ maiñ imārat ke qarīb
gir paḌī kyuuñ chhat dar-o-dīvār se ho kar alag

mere marne kī ḳhabar sun kar lagā kahne vo shoḳh
dil hī dil meñ apne kuchh kuchh soch kar achchhā huā

havā se aag se paanī se muttasil rah kar
inhīñ se apnī tabāhī kā Dar bhī rakhnā hai

havā ke ruḳh ko badalnā agar nahīñ mumkin
havā kī zad pe safar kā hunar bhī rakhnā hai

dast-e-san.at se bane us ke agar tujh sā but
kyuuñ havā apnī ḳhudā.ī kī na aazar bāñdhe

har dam duā-e-āb-o-havā māñgte rahe
nañge daraḳht sabz qabā māñgte rahe

kitnī ajiib baat thī jab sard raat se
ham dopahar kī garm havā māñgte rahe

jañg-e-hayāt-o-maut meñ kyā kyā nahīñ huā
guzrā hai dard had se pe chāra nahīñ huā

maiñ ne sadā rakhīñ yahīñ qatroñ sī fitrateñ
maiñ aaj tak ġhurūr kā dariyā nahīñ huā

kyā hādsa hai ye bhī ki rishta tirā mirā
bas biij rah gayā kabhī paudā nahīñ huā

jab ilm ne jahān ko taqsīm kar diyā
achchhā hai lā-ḳhirad huuñ maiñ daanā nahīñ huā

bīmāriyoñ meñ aa.egā pursish ko roz vo
ye soch kar 'sahāb' maiñ achchhā nahīñ huā

saarā badan hai dhuup meñ jhulsā huā magar
dil par jo paḌ rahā hai vo saaya ajiib hai

'aḳhtar' ye tere paañv ke kāñTe na.e nahīñ
kāñToñ se kheltā huā chhālā ajiib hai

us kī nazroñ meñ thā jaltā huā manzar kaisā
ḳhud jalā.ī huī sham.oñ ko bujhā detā thā

aag meñ lipTā huā hadd-e-nazar tak sāhil
hausla Dūbne vāloñ kā baḌhā detā thā

kar sako to mirī talāsh karo
in dinoñ maiñ havā sā rahtā huuñ

havā ke loch galī se nikhār māñgā thā
tire jamāl kā chehra sañvārne ke liye

ka.ī roz meñ aaj vo mehr-liqā huā mere jo sāmne jalva-numā
mujhe sabr o qarār zarā na rahā use pās-e-hijāb-o-hayā na rahā