Tags-Hawa

zindagī meñ kasak zarūrī thī
ye ḳhalā pur tirī kamī se huā

dil tarafdār-e-hijr thā hī nahīñ
ab huā bhī to be-dilī se huā

shor jitnā hai kā.enāt meñ shor
mere andar kī ḳhāmushī se huā

kaisā mansab hai aadmī kā ki rab
jab muḳhātib huā usī se huā

peḌ ho yā ki aadmī 'ġhā.er'
sar-buland apnī ājizī se huā

huā kaisā asar ma.asūm zehnoñ par ki bachchoñ ko
agar paise dikhāo to khilaunā chhoḌ dete haiñ

muddatoñ ba.ad vo huā qaa.el
ham use kab qubūl the pahle

is hādse ko sun ke karegā yaqīñ koī
sūraj ko ek jhoñkā havā kā bujhā gayā

zarra vo rāz-e-bayābāñ hai jo ifshā na huā
dasht-e-vahshat hai vo zarra jo bayābāñ ho jaa.e

ajiib āb-o-havā kā vo rahne vaalā hai
milegā ḳhvāb o ḳhalā meñ kahīñ vatan us kā

mirī nazar meñ hai mahfūz aaj bhī 'bānī'
badan kasā huā malbūs be-shikan us kā

sahrā meñ aa nikle to ma.alūm huā
tanhā.ī ko vus.at kam paḌ jaatī hai

aam hai izn ki jo chāho havā par likh do
ishq zinda hai zarā dast-e-sabā par likh do

haañ kyā huā vo hausla-e-dīd-e-ahl-e-dil
dekho nā vo naqāb uThā.e hue to haiñ

zikr un kā gar zabāñ pe nahīñ hai to kyā huā
ab tak nafas nafas meñ samā.e hue to haiñ

merā to ye hai ki maiñ bikhrā huā huuñ ab tak
tū batā mujh se bichhaḌ kar tirī hālat kyā hai

naqsh jab zaḳhm banā zaḳhm bhī nāsūr huā
jā ke tab koī masīhā.ī pe majbūr huā

na jaane kal hoñ kahāñ saath ab havā ke haiñ
ki ham parinde maqāmāt-e-gum-shuda ke haiñ

fasīl-e-shab se ajab jhāñkte hue chehre
kiran kiran ke haiñ pyāse havā havā ke haiñ

zindagī kā diyā huā chehrā ishq-dariyā meñ dho ke aa.e haiñ
'farhatūllāh'-ḳhāñ ga.e the vahāñ farhat-ehsās ho ke aa.e haiñ