Tags-Hawa

pūchh na 'qā.em' kī kaTī kyūñki umr
juuñ havā yak-chand basar kar gayā

to yuuñ kaho nā diloñ kā shikār karnā hai
havā ke saath safar iḳhtiyār karnā hai

ḳhatā-e-ishq par ham par na itnā bhī sitam Dhaao
agar chāhā to chāhā kyā huā dil ham bhī rakhte the

phuul se logoñ ko miTTī meñ milā kar aa.egī
chal rahī hai jo havā sab kuchh fanā kar jā.egī

aane vaale mausamoñ kī sar-phirī pāgal huā
ek din terī judā.ī ke tarāne gā.egī

gunāh jis se na sarzad huā ho ai 'ājiz'
usī ko haq hai vo kah de gunāhgār mujhe

terī āñkhoñ ke liye itnī sazā kaafī hai
aaj kī raat mujhe ḳhvāb meñ rotā huā dekh

zaḳhm-e-dil aur harā ḳhūn-e-tamannā se huā
tishnagī kā mirī āġhāz hī dariyā se huā

chubh ga.ī halq meñ kāñToñ kī tarah pyaas mirī
dasht sairāb mire ābla-e-pā se huā

dil-e-zinda ko chunā dard kī dīvāroñ meñ
rok letī mujhe itnā bhī na duniyā se huā

sar meñ saudā thā magar paañv meñ zanjīr na thī
ḳhaak uḌātā rahā mansūb na sahrā se huā

pher diiñ kis ne salāḳheñ sī mirī āñkhoñ meñ
kaun añgusht-numā tāq-e-tamāshā se huā

duur jā kar mirī āvāz sunī duniyā ne
fan ujāgar mirā ā.īna-e-fardā se huā

bū mizājoñ se ga.ī rañg uḌe chehroñ ke
ḳhush yahāñ kaun mire dīda-e-bīnā se huā

ajnabī sā nazar aayā huuñ 'muzaffar' ḳhud ko
be-takalluf jo maiñ is ahd-e-shanāsā se huā

is hirs-o-havā kī tīrgī meñ
sonā sā damak rahā huuñ kab se

mālūm ye ab huā ki 'shohrat'
dīvāna huuñ bak rahā huuñ kab se

maiñ apne lahje se har lamha ḳhauf khātā huuñ
chhupā huā hai koī shaḳhs tund-ḳhū mujh meñ

har ek bachcha hai ek bachcha na hai kisī kā kabhī adū vo
ye bhed bhaav ye fāsla sab ḳhud apnā paidā kiyā huā hai

kabhī aisā bhī hotā hai ki raahī
nazar aatā hai kuchh ruktā huā sā