Tags-Hawa

tujh se bichhaḌ ke ghar kī taraf lauTte hue
kyuuñ bastiyoñ kā vahm huā har chaTān par

thī jin kī dastaras meñ havā pā-ba-gil hue
ai musht-e-ḳhāk zo.am kahāñ kā uḌaan par

jalā dil aur huā raakh muddateñ guzrīñ
ye ab uThā hai kahāñ se dhuāñ nahīñ ma.alūm

vo ik lamha jo tere vasl kā thā
bayāz-e-hijr par likkhā huā hai

ye kyā pāgal tamannā hai jo socho meñ utar ga.ī hai
paroñ meñ ik ajnabī havā bhar ga.ī hai

un kī nigāh-e-nāz kī gardish ke saath saath
mahsūs ye huā ki zamāna badal gayā

har galī kī moḌ par ik piir hai baiThā huā
pūchhtā hai jis se har ik zindagī kā rāsta

mujh ko ma.alūm huā ab ki zamāna tum ho
mil ga.ī rāh-e-sukūñ gardish-e-daurāñ ke qarīb

maiñ so gayā to zamāne kī khul ga.iiñ āñkheñ
maiñ jāgtā thā to soyā huā zamāna thā

na hone kā gumāñ rakkhā huā hai
ki hone meñ ziyāñ rakkhā huā hai

zamīñ ke jism par qabreñ nahīñ haiñ
ḳhayāl-e-raftagāñ rakkhā huā hai

sar-e-mizhgāñ mire aañsū nahīñ haiñ
sulūk-e-dostāñ rakkhā huā hai

yahāñ jo ik charāġh-e-zindagī thā
na jaane ab kahāñ rakkhā huā hai

ye duniyā ik tilism-e-āb-o-gil hai
yahāñ sab rā.egāñ rakkhā huā hai

ye suḳhan jo merī zabāñ pe hai ye suḳhan hai us kā kahā huā
ye bayāñ jo hai mire naam se ye bayāñ hai us kā likhā huā

vahī mailī mailī sī chāñdnī vahī dhundlī dhundlī sī raushnī
ye charāġh koī charāġh hai na jalā huā na bujhā huā

vahī ek yaad kiran kiran mirī zindagī meñ hai zau-fagan
vahī ek chehra chaman chaman sar-e-dasht-e-jāñ hai khilā huā

sar-e-rāh kuchh na patā chalā vo kahāñ gayā vo kidhar gayā
kahīñ naqsh-e-pā thā banā huā kahīñ naqsh-e-pā thā miTā huā

karūñ dostoñ ko maiñ nazr kyā mire paas dām-o-diram kahāñ
vo jo dushmanoñ kā hisāb thā vo to naqd-e-jāñ se adā huā

na kisī kī yaad kā naqsh hai na kisī ke ruḳh kā ye aks hai
ye na koī harf na lafz hai sar-e-ḳhāk kyā hai likhā huā