Tags-Ehsaas

ban hī jā.egā kabhī koī ḳhudī kā paikar
apne ehsās kī garmī se pighalte rahiye

shauhar kī nazar hasrat se bharī uThtī hai to ḳhud jhuk jaatī hai
ehsās-e-mohabbat kī duniyāñ us manzar se tharrātī hai

ehsās shabāb ġham mohabbat
ek ek nasha utar gayā thā

mire isbāt kī chābī ko apne paas rakh kar
mire inkār ko ehsās se bāñdhā huā hai

kisī ke ḳhvāb ko ehsās se bāñdhā huā hai
bahut puḳhta bahut hī paas se bāñdhā huā hai

ajab pahre mire afkār par rakkhe haiñ 'ḳhālid'
ajab khaTkā mire ehsās se bāñdhā huā hai

phir tez havā chalte hī be-kal huiiñ shāḳheñ
kis dard ke ehsās se bojhal huiiñ shāḳheñ

baḌhā tanhā.ī meñ ehsās-e-ġham āhista āhista
hameñ yaad aa.e sab ahl-e-karam āhista āhista

jinheñ ehsās bhī shāyad na ho jazbāt-e-ulfat kā
ye merā saada dil un par hai sau jaañ se nisār ab tak

kaun tanhā.ī kā ehsās dilātā hai mujhe
ye bharā shahr bhī tanhā nazar aatā hai mujhe

jhilmilāte hue sapnoñ kā svayambar ban kar
bijliyāñ sī mire ehsās meñ lahrā.ī haiñ

gard-ālūd aise socheñ haiñ
koī ehsās ho ḳhafā jaise

ehsās-e-ziyāñ ham meñ se akasr meñ nahīñ thā
is dukh kā mudāvā kisī patthar meñ nahīñ thā

be-ḳhudī naam hai ehsās-e-ḳhudī kā shāyad
varna kuchh aur thā mansūr ḳhabar hone tak

fitrat ne de ke ishq ko ehsās-e-zabt-e-shauq
uljhā diyā hai kashmakash-e-lā-zavāl meñ

'rāz' ehsās ke āñgan meñ hoñ tanhā tanhā
ghup añdherā hai magar saath haiñ ġham ke saa.e

ro.eñ yā hañseñ is hālat par ehsās ye hotā hai aksar
va.ada to kisī se 'shāz' na thā ham haiñ ki mukarte jaate haiñ

kahāñ ga.ī ehsās kī ḳhushbū fanā hue jazbāt kahāñ
ham bhī vahī haiñ tum bhī vahī ho lekin ab vo baat kahāñ

naqd-e-ehsās ki insāñ kā bharam hotā hai
ham ne khoyā hai kahāñ aap ne paayā kab thā

kuchh to hai rañg sā ehsās ke parde meñ nihāñ
jis ko manzar kī tarah vaqf-e-nazar karnā hai