Tags-Duniya

rakhe tū jab tak jahāñ meñ yā-rab tire karam se umiid ye hai
rahe na mutlaq talāsh-e-daulat kareñ na duniyā kī justujū ham

itnā mānūs huuñ maiñ duniyā se
koī pal ho gila nahīñ hotā

haath se duniyā nikaltī jā.egī
aur duniyā haath maltī jā.egī

farsh kā qissa jiyūñ jiyūñ pahuñchā baam pe saaqī jhuum uThā
kis ne naqsha aisā badlā duniyā ke mai-ḳhānoñ kā

taj ke duniyā ko jab chale 'tā.ib'
saath ik aarzū kī duniyā thī

sher kahne se na mahbūb na duniyā hī milī
umr-bhar sher kahe sher sunā.e ham ne

ġham-e-duniyā ġham-e-daurāñ ġham-e-dil
sabhī tere sivā bhūlā huā huuñ

vo nahīñ haiñ to nigāhoñ meñ hai duniyā andher
kaise raushan the munavvar the dar-o-bām abhī

kyā husn hai duniyā meñ kyā lutf hai jiine meñ
dekhe to koī merā andāz-e-nazar le kar

yā duniyā kā ḳhauf haTā
yā phir ham se yaarī chhoḌ

dīvānoñ se haath milā
ab ye duniyā-dārī chhoḌ

zulf to zulf hai duniyā se bhī uljhe haiñ ki ham
ik bagūlā bhī bane hāmil-e-sahrā bhī hue

tum to sun paa.e na āvāz-e-shikast-e-dil bhī
kuchh hamīñ the ki harīf-e-ġham-e-duniyā bhī hue

maiñ to tālib dil se hūñgā diin kā
daulat-e-duniyā mujhe matlūb nahīñ

dil mirā aur ye ġham-e-duniyā
kyā tire ġham kī pāsbānī hai

ḳhud-kushī par hai aaj āmāda
are duniyā baḌī divānī hai

suunī duniyā meñ ab to maiñ huuñ aur
mātam-e-ishq-e-āñ-jahānī hai

maiñ kisī ke adl kī TuuTī huī zanjīr huuñ
mujh pe jo biitī hai duniyā ko batā.ūñ kis tarah

ye duniyā miT ga.ī hotī kabhī kī
magar ik naam aisā aa gayā hai

mujhe pāgal samajhtī hai ye duniyā
tasavvur meñ tire khoyā huā huuñ