Tags-Dil

vo jo rūThe maiñ ne bhī khā lī na milne kī qasam
phir na dil maanā to ḳhud jā kar manānā hī paḌā

zabt kā yaarā nahīñ sayyād kā bhī hai ḳhayāl
nāla-e-dil-soz ko naġhma banānā hī paḌā

rahegī dil meñ na jab koī bhī ḳhalish 'mohsin'
bhulā chukā hai jise tū use pukāregā

jab vo nahīñ hote pahlū meñ aur lambī rāteñ hotī haiñ
yaad aa ke satātī rahtī hai aur dil se bāteñ hotī haiñ

jo kuchh bhī ḳhushī se hotā hai ye dil kā bojh na ban jaa.e
paimān-e-vafā bhī rahne do sab jhūTī bāteñ hotī haiñ

kisī ke dil meñ kyā hai māthe pe likkhā nahīñ hotā
ki apne log bhī to ham se pahchāne nahīñ jaate

ka.ī rāz-e-mohabbat dil meñ poshīda hī rahte haiñ
ye gauhar jauharī se bhī to pahchāne nahīñ jaate

itne barsoñ ba.ad bhī donoñ kaise TuuT ke milte haiñ
tū hai kitnā sāda-dil aur ham kitne pechīda haiñ

tum ne āñkheñ to khulī rakkhī haiñ apnī lekin
dil kā darvāza khule tab koī andar aa.e

ham se to jafāoñ ke shikve tum hañs kar chhīn bhī sakte ho
ham dil ko pashemāñ kar leñge tum pyaar se aañkh jhukāo bhī

tilism-e-band se mushkil rihā.ī hai dil kī
hisār-e-chashm-e-fusūñ-sāz meñ ghirā huuñ maiñ

vaise to dil ke TūTne kā kuchh nahīñ malāl
lekin tire jamāl kī sūrat isī meñ thī

kuchh bhī kar paa.e na ham hijr kī hairānī meñ
ghar bhī vīrān kiyā dil kī pareshānī meñ

ḳhalvat-e-dil ke añdheroñ meñ vo sūraj niklā
muñd ga.ī aañkh mirī ruuh kī tābānī meñ

shauq-e-dil fikr-e-dahan meñ hai jo rahbar kī tarah
DhūñDhtā huuñ chashma-e-haivāñ sikandar kī tarah

merī aahoñ ko abas hai nā-rasā.ī kā gila
dil meñ ghar karnā to sīkheñ yād-e-dilbar kī tarah

dard-e-dil uTh uTh ke Dhātā hai qayāmat jaan par
shām-e-hijr-e-āshiqāñ hai sub.h-e-mahshar kī tarah

dil ko āñkhoñ ne sujhā.ī haiñ jo rāheñ ishq kī
har jagah mujh ko liye phirtā hai rahbar kī tarah

is ko lutf-e-dard us ko lazzat-e-mashq-e-jafā
dil kī aadat bigḌī hai ḳhū-e-sitamgar kī tarah

un kī aamad kī ḳhabar sun kar hujūm-e-shauq se
kashmakash hai ḳhāna-e-dil meñ bhare ghar kī tarah