us ko chhūne ko ka.ī haath nikal kar aa.e
chāñd se kis ne kahā thā ki vo chhat par aa.e
ho uThā phir se siyāsat meñ samundar manthan
zahr piine ke liye phir koī shañkar aa.e
tum ne āñkheñ to khulī rakkhī haiñ apnī lekin
dil kā darvāza khule tab koī andar aa.e
maiñ to farhād nahīñ qais bhī rāñjhā bhī nahīñ
kyuuñ mirī samt har ik samt se patthar aa.e
ġham meñ Duubī huī ġhazloñ ke jo aañsū poñchhe
aisā koī to zamāne meñ suḳhnavar aa.e
maiñ vo dariyā huuñ jo ghar se kabhī niklā hī nahīñ
pyaas le kar merī chaukhaT pe samundar aa.e