Tags-Dil

qalaq se hotī hai kuchh dil kī mere ye hālat
ki niiñd raat ko do do pahar nahīñ aatī

hai dukān-e-shauq bharī huī koī mehrbāñ ho to le ke aa
zar dāġh-e-dil kā savāl hai koī naqd-e-jāñ ho to le ke aa

jo ho zauq-e-dard kā ye samāñ to uchhāl de koī āsmāñ
tire dāġh-e-dil mah-o-mehr meñ kahīñ kahkashāñ ho to le ke aa

ye hai shaam mausam-e-dard kī ye hai sub.h chehra-e-zard kī
hai bahār par ġham-e-zindagī koī dil-ḳhizāñ ho to le ke aa

ye safar hai manzil-e-shauq kā koī ham-safar koī ham-rahī
kisī dil-shikasta ko saath le koī sargirāñ ho to le ke aa

zarā ḳhud se 'bāqar'-e-be-navā tū nikal ki tai ho mo.āmla
inheñ mil ye log haiñ ahl-e-dil ġham-e-rā.egāñ ho to le ke aa

ḳhud apne haal kī koī ḳhabar nahīñ miltī
koī bhī jazba-e-dil-e-mo.atabar nahīñ miltā

farāġh-e-dil nahīñ ab kū-e-gul-e-ruḳhāñ meñ kahīñ
ki zaḳhm koī yahāñ kārgar nahīñ miltā

jaane vāloñ se pūchhnā ye sabā
rahe ābād dil-galī kab tak

dil ne jo umr-bhar kamā.ī hai
vo dukhan dil se jā.egī kab tak

yuuñ to har lamha tirī yaad kā bojhal guzrā
dil ko mahsūs huī terī kamī shaam ke ba.ad

yuuñ to kuchh shaam se pahle bhī udāsī thī 'adīb'
ab to kuchh aur baḌhī dil kī lagī shaam ke ba.ad

mujh sā na de zamāne ko parvardigār dil
āshufta dil farefta dil be-qarār dil

har baar māñgtī haiñ nayā chashm-e-yār dil
ik dil ke kis tarah se banā.ūñ hazār dil

mash.hūr ho ga.ī hai ziyārat shahīd kī
ḳhūñ-kushta aarzū kā banā hai mazār dil

ye said-gāh-e-ishq hai Thahrā.iye nigāh
sayyād-e-muztarib se na hogā shikār dil

tūfān-e-nūh bhī ho to mil jaa.e ḳhaak meñ
allāh re ġhubār tirā pur ġhubār dil

pūchhā jo us ne tālib-e-roz-e-jazā hai kaun
niklā mirī zabān se be-iḳhtiyār dil

karte ho ahd-e-vasl to itnā rahe ḳhayāl
paimān se ziyāda hai nā-pā.edār dil

tāsīr-e-ishq ye hai tire ahd-e-husn meñ
miTTī kā bhī banā.eñ to ho be-qarār dil