Tags-Dil

hazār bain kaheñ kyuuñ na ahl-e-bīnā.ī
ki saaf bū-qalamoñ hai ye aa.inā dil kā

bahār tujh ko dikhā.eñge ham bhī ai gul-rū
kisī ravish se jo ġhuncha kabhī khilā dil kā

zuhūr-e-jalva-e-ma.abūd hai bahar-sūrat
rakhā hai naam bajā ḳhāna-e-ḳhudā dil kā

ruvāq-e-chashm meñ mat rah ki hai makān-e-nuzūl
tire to vāste ye qasr hai banā dil kā

qarār o tāqat o sabr o ḳhirad hue sab gum
tumhārī zulf meñ abtar hai haal kyā dil kā

kaheñge ham ye sarāsar jo koī pūchhegā
savād-e-hind meñ luuTā hai qāfila dil kā

na kyūñki aah se ḳhātir nishāñ ho ab merī
ki tiir ye nahīñ kartā kabhī ḳhatā dil kā

hamāre daaġh se bhañvre ko kyā bhalā nisbat
ki vo rafīq hai gul kā ye āshnā dil kā

lagā na dil ko tū apne kisī se dekh 'nasīr'
burā na maan ki is meñ nahīñ bhalā dil kā

kaT gayā rishtha-e-ulfat jo tirā naam aayā
dil vafādār thā lekin na mire kaam aayā

ishq ke hāthoñ charāġh ek sar-e-shām aayā
tīra-baḳhtī meñ mirā dil hī mire kaam aayā

ham se shāyad hī kabhī us kī shanāsā.ī ho
dil ye chāhe hai ki shohrat ho na rusvā.ī ho

ye baat baat pe zāhid jo TuuT jaatā hai
dil-e-hazīñ bhī hamārā tirā vuzū kyā hai

har koī pārsā.ī kī umda misāl thā
dil ḳhush huā hai ek gunahgār dekh kar

daaġh huuñ lāla-e-aqavām-e-jahāñ ke dil kā
maiñ bahāroñ ke kaleje pe ḳhizāñ rakhtā huuñ

merī duniyā meñ na ka.aba hai na but-ḳhāna 'nushūr'
dil ke goshe meñ magar dair-e-muġhāñ rakhtā huuñ

aur na mailā kar duuñ us ke dāman ko
daaġh jo us ke dil se dhone vaalā huuñ

firāq mausam kī chilmanoñ se visāl lamhe chamak uTheñge
udaas shāmoñ meñ kāġhaz-e-dil pe guzre vaqtoñ ke baab likhnā

aap maiñ ne diyā dil us but ko
jhuk ga.ī shāḳh ḳhud samar le kar

ye dil shahīd-e-fareb-nigāh ho na sakā
vo laakh ham se ba-andāz-e-mahramāna milā