Tags-Dil

allāh re toḌ nīchī nigāhoñ ke tiir kā
uf bhī na karne paa.e the aur dil ke paar thā

dil meñ aatā hai karūñ ai gul-e-ḳhandāñ tujh bin
baiTh kar girya kisī naḳhl-e-gulistāñ ke tale

vasā.el jab ki saare ho chuke the be-asar 'anjum'
charāġh-e-dil jalā kar duur kī hai tīrgī ham ne

ishq ko naġhma-e-ummīd sunā de aa kar
dil kī soī huī qismat ko jagā de aa kar

baat vafā kī dil vāloñ kī nagrī meñ hai aam bahut
shahr-e-butāñ meñ giit vafā ke gā paao to baat bane

ek diyā kab rok sakā hai raat ko aane se
lekin dil kuchh sambhlā to ik diyā jalāne se

tahakkumāna adā aur faisle dil ke
kamān-e-ābru-e-ḳham-dār toḌ dī maiñ ne

āñkhoñ kī nadī suukh ga.ī phir bhī harā hai
vo dard kā paudā jo mire dil meñ ugā hai

ham ne kyā us se mohabbat kī ijāzat lī thī
dil-shikan hī sahī par baat bajā us kī hai

ai mere dil ke chain mire dil kī raushnī
aa aur sub.h kar de shab-e-intizār kī

aañkh meñ ḳhema-zan nīl-gūñ vus.ateñ apnā pahlā qadam hī ḳhalāoñ meñ hai
jo jafā ke jazīra-numāoñ meñ hai dil kā us ḳhāk-e-ḳhasta se naatā rahā

ik haath dharā dil pe ik añgusht dahan meñ
yuuñ kushta-e-ulfat kī tire laash paḌī thī

koī achchhī bhī ḳhabar kaan meñ aa.e yārab
aisī ḳhabroñ se to dil shaad nahīñ hone ke

bastī ke sulagte hue ghar dekh rahe haiñ
dil-doz manāzir haiñ magar dekh rahe haiñ

javānoñ ke pahlū meñ khilte hue dil
hasīnoñ kī nazroñ se bāda-parastī

karachi kī saḌkeñ baḌī tañg-dil haiñ
ġharībo tumhārā ḳhudā rāhbar hai

ye zarre jin ko ham ḳhāk-e-rah-e-manzil samajhte haiñ
zabān-e-hāl rakhte haiñ zabān-e-dil samajhte haiñ

jise sab log husn o ishq kī manzil samajhte haiñ
buland us se bhī ham apnā maqām-e-dil samajhte haiñ

hameñ kyuuñ vo jafā-e-ḳhās ke qābil samajhte haiñ
ye rāz-e-dil hai is ko mahramān-e-dil samajhte haiñ

ab bhī sharh-e-soz-e-dil kartī hai parvāne kī ḳhaak
sun rahī hai sham.a ḳhāmoshī se afsānā hanūz