Tags-Dil

lalak ek sī na ai koyal na tirā sā dil hai merā dil
tirī kuuk ko maiñ kyā samjhūñ mirī huuk ko tū kyā jaane

huā bhole-pan pe jo bismil vo to apnā aap hai qātil
ye samajh kā pher hai ai dil sitam-o-jafā vo kyā jaane

achānak le na luuñ bosa ye khaTkā un ke dil meñ hai
mire pahlū meñ baiThe haiñ magar hoshyār baiThe haiñ

dil pe jo guzre hai mere aah maiñ kis se kahūñ
kyā karūñ maiñ ai mire allāh maiñ kis se kahūñ

jab na tum hī hāl-e-dil merā kabhī aa kar suno
to ye farmāo mujhe, allāh maiñ kis se kahūñ

be-qarārī kā sabab apnī kahūñ kis se 'nizām'
dil pe jo hai sadma-e-jāñ-kāh maiñ kis se kahūñ

bose kī talab se to rahegā tabhī ai dil
jab gāliyāñ do-chār vo tanḳhvāh karegā

ahvāl-e-dil-e-zār tujhe hovegā mālūm
jab tū kisī mah-vash kī miyāñ chaah karegā

dil kī buniyād pe ta.amīr kar aivān-e-hayāt
qasr-e-shāhī to zarā der meñ Dah jaate haiñ

zikr-e-gul kyā hai sabā ab ki ḳhizāñ meñ ham ne
dil ko nā-chār lagāyā hai ḳhas o ḳhaar ke saath

kis ko har dam hai lahū rone kā hijrāñ meñ dimāġh
dil ko ik rabt sā hai dīda-e-ḳhūñ-bār ke saath

bahut se aise sitamgar the ab jo yaad nahīñ
kisī habīb-e-dil-āzār ke alāva bhī

jo dil ko hai ḳhabar kahīñ miltī nahīñ ḳhabar
har sub.h ik azaab hai aḳhbār dekhnā

na pūchho dil kī haqīqat tumhāre ishq meñ aah
use vo ġham jo lagā hai usī meñ galtā hai

ye ham ko us kī javānī ne aur iizā dī
ki raat din koī siine meñ dil ko maltā hai

husn kī laa.ī huī ek bhī aafat na ga.ī
dil kī dhaḌkan na ga.ī dard kī shiddat na ga.ī

husn-e-dilkash ise kahte haiñ ki ham saarī umr
un ko dekhā kiye dīdār kī hasrat na ga.ī

na hudūd meñ na quyūd meñ mirā dil tire hī vajūd meñ
ye sujūd kā hasīñ pairahan mirī ruuh par to sajā piyā

ye qadam qadam pe bashārateñ ye nazar nazar meñ ziyārateñ
ye basārteñ ye bujhārteñ mire shahr-e-dil ko dikhā piyā

ye kūche ye nīlām ghar dilkashī ke
ye luTte hue kārvāñ zindagī ke