Tags-Dil

girnī thī ham pe barq-e-tajallī na tuur par
dete haiñ baada zarf-e-qadah-ḳhvār dekh kar

bāham huī yuuñ to dīd-vā-dīd
par dil kā hijāb kuchh na niklā

siine meñ jo dil kī kī tafahhus
juz dūd-e-kabāb kuchh na niklā

sunā.ūñ agar tā-qayāmat to kyā
kahānī mirī dil-nashīñ ho chukī

tarāvish kahāñ zaḳhm-e-dil meñ vo ab
kahīñ kuchh rahī hai kahīñ ho chukī

ye dil nahīñ nuur kā hai sho.ala kisī ko is se zarar nahīñ hai
misāl barq-o-sharar hai lekin mizāj barq-o-sharar nahīñ hai

hai rū-kash-e-āftāb zarra baġhair parda bilā-vasīla
vahāñ lagā.ī hai aañkh dil ne jahāñ majāl-e-nazar nahīñ hai

vo nīchī nazreñ thiiñ dil kī tālib vafā ne go jaan nazr kar dī
magar asar jo savāl meñ thā javāb meñ vo asar nahīñ hai

suḳhan mirā kaif-e-dil hai 'nātiq' vo qadr karte haiñ jo ho āshiq
nahīñ hai ye falsafa kitābī ye iktisābī hunar nahīñ hai

jab tak ki dil na laagā un be-muravvatoñ se
ayyām apne guzre kyā kyā farāġhatoñ se

mazmūn soz-e-dil kā kahte hī uḌne laage
harf o nuqat sharar-sāñ yaksāñ kitābatoñ se

'bedār' sair-e-gulshan kyūñ-kar ḳhush aave mujh ko
juuñ laala daaġh hai dil yāroñ kī furqatoñ se

kāba-e-dil se milī manzil-e-maqsūd kī raah
yaar kā ham ne usī kūche meñ ghar dekh liyā

aahoñ se aag lagā deñge dil-e-dushman meñ
chhup ke rahte haiñ jahāñ aap kā ghar dekh liyā

bach gayā naqd-e-dil ab ke to nazar se us kī
aa.egā phir bhī agar chor ne ghar dekh liyā

bujhegā soz-e-dil ai girya pal meñ aab to de
digar hai aag meñ duniyā yuuñ hī azaab to de

dil-e-birishta ko mere na chhoḌo mai-ḳhvāro
jo lazzat us meñ hai aisā mazā kabāb to de

kahāñ bujhī hai tah-e-ḳhāk merī ātish-e-dil
kaho havā se hilā dāman-e-sahāb to de

dil kī kaayā ġham ne vo palTī ki tujh sā ban gayā
dard meñ dil Duub kar qatre se dariyā ban gayā

dil kī rut aisī to yād-e-yār ne badlī na thī
ye chaman ujḌā hī is Dhab se ki sahrā ban gayā