Tags-Dil

kyuuñ zulf tirī uljhī rahtī hai ai jānāna
hāzir hai dil-e-sad-chāk darkār ho gar shāna

is dil kā mire jalnā rakhtā hai vo kaifiyyat
dekhegā jo parvāna ho jā.egā mastāna

aañsū bahte haiñ aur dil ye soch ke Dartā hai
aañkh kahīñ koī baat na kah de us se ravānī meñ

jab use dekho aañkh aur dil ko saath milā lenā
ik ā.īna kam paḌ jā.egā hairānī meñ

imtihāñ karne ko yuuñ dil se kahā ham ne raat
ai dil-e-ġham-zada is kākul-e-pechāñ se nikal

kisī ko dil se bhulāne meñ der lagtī hai
ye kapḌe kamre ke andar sukhāne paḌte haiñ

kuchh samajh aayā na aayā maiñ ne sochā hai use
zehn par us ko utārā dil pe likkhā hai use

ek shai jis ko umūman sirf dil kahte haiñ log
mar gayā hotā magar maiñ ne bachāyā hai use

karb dil kā mere lab par aa.egā 'manzūr' kyā
maiñ ne ḳhūn-e-dil se kāġhaz par utārā hai use

dil ne bhī thak-hār ke āḳhir dar-darvāze band kiye
kaun ho ab is ġham kā nigahbāñ maiñ bhī sochūñ tū bhī soch

duniyā kī mahfiloñ se uktā gayā huuñ yā rab
kyā lutf anjuman kā jab dil hī bujh gayā ho

dil-o-nazar meñ hī apne ḳheme lagā liye haiñ
hameñ ḳhabar hai ki rāsta hai ḳharāb aage

haath nikle apne donoñ kaam ke
dil ko thāmā un kā dāman thaam ke

yā jigar meñ yā rahegā dil meñ tiir
ye hī do goshe to haiñ ārām ke

nazar uThā dil-e-nādāñ ye justujū kyā hai
usī kā jalva to hai aur rū-ba-rū kyā hai

suḳhan ho sam.a-ḳharāshī to ḳhāmushī behtar
asar kare na jo dil par vo guftugū kyā hai

goyā 'asad' hai dil kī zabāñ dil kā aa.ina
kis darja saaf hotī hai ahl-e-safā kī baat

qurbat-pasand dil kī tabī.at meñ thā tazād
ḳhush ho rahā huuñ hijr kā sadma uThā maiñ

āñkhoñ ko terī diid mayassar nahīñ magar
dil jañg kar rahā hai rasad ke baġhair bhī

ik munfarid maqām kī hāmil hai terī zaat
tū dil meñ hai qubūl yā rad ke baġhair bhī