Tags-Dil

saikḌoñ shīsha-e-dil bāda-kashoñ ke toḌe
mohtasib se haiñ ziyāda vo ḳhumārī āñkheñ

ye ḳhvāb hote hue sahīfoñ ke phuul mere liye haiñ lekin
zamīn-e-dil par ye āyatoñ kā nuzūl ik dahr ke liye hai

vo chahchahe na vo tirī āhañg andalīb
kis gul kī yaad meñ hai tū dil-e-tañg andalīb

kaleje meñ phaphūle dil meñ daaġh aur gul haiñ hāthoñ par
khile haiñ dekhiye ham meñ bhī ye ulfat ke gul-būTe

tafāvut kuchh nahīñ gulchīñ meñ aur be-dard ḳhūbāñ meñ
jo us ke haath gul TuuTe to in ke haath dil TuuTe

hazāroñ gāliyāñ diiñ phir zarā hañs kar idhar dekhā
bhalā itnī tasallī se phaphūle dil ke kab phūTe

kuchalte ho mujhe tum maiñ ye māñgūñ huuñ duā dil meñ
koī dilbar mire aage tumheñ bhī ḳhuub sā kuuTe

milne kī tarah mujh se vo pal bhar nahīñ miltā
dil us se milā jis se muqaddar nahīñ miltā

us chāñd ko tum dil meñ chhupā kyuuñ nahīñ lete
is pyaas kī shiddat ko bujhā kyuuñ nahīñ lete

is shahr meñ haiñ laakh tabīboñ kī dokāneñ
bīmār hai gar dil to davā kyuuñ nahīñ lete

hai dil meñ 'riyāz' apne chhupī dard-kahānī
ro-dho ke zamāne ko sunā kyuuñ nahīñ lete

dar aayā añdherā āñkhoñ meñ aur sab manzar dhundlā.e haiñ
ye vaqt hai dil ke Dūbne kā aur shaam ke gahre saa.e haiñ

vo lamha dil kī aziyyat kā to guzar gayā ab sochne do
kyā kahnā hogā un se mujhe jo pursish-e-ġham ko aa.e haiñ

vasl meñ bhī ye muztarib hī rahā
is dil-e-be-qarār ne maarā

duur ho jaatī hai jab mazdūroñ ke dil kī jalan
jab tabassum ban ke hoñToñ par simaTtī hai thakan

hogā asar jo dil meñ to ḳhud jaan leñge vo
'mushtāq' ham se ishq jatāyā na jā.egā

na maiñ ka.abe meñ rahtā huuñ na maiñ kāshī meñ rahtā huuñ
garebāñ jhāñk kar dekho maiñ tere dil meñ basta huuñ

uThtā hai jab tabāhī-e-dil kā kabhī savāl
aa aa ke Thahar jaatā hai lab par tumhārā naam

kaise miTā.e mauj-e-havādis tumhī kaho
hai naqsh zehn-o-dil pe gul-e-tar tumhārā naam

had-darja jāñ-gudāz haiñ yādoñ ke silsile
kaise 'sahar' bhulā.egā dilbar tumhārā naam