Tags-Dil

na kyūñkar rashk-e-dushman se ḳhalish ho ḳhār-e-hasrat kī
ye vo kāñTā hai jis se paañv meñ kyā dil meñ chhāle haiñ

ye sadma jiite jī dil se hamāre jā nahīñ saktā
unheñ vo bhūle baiThe haiñ jo un par marne vaale haiñ

ye dilkashī kahāñ mirī shām-o-sahar meñ thī
duniyā tirī nazar kī badaulat nazar meñ hai

kise ḳhabar thī ki sūraj ko shaam Das legī
hamāre barf se dil meñ lahū pighalne tak

tañgi-e-dil kā gila kyā ye vo kāfir-dil hai
ki agar tañg na hotā to pareshāñ hotā

dil ek ātish-e-ḳhāmosh hī sahī lekin
tumhārī yaad meñ koī kamī nahīñ hotī

nahīñ haiñ tere dām-e-zulf meñ dil
laTakte haiñ hazāroñ murġh par-band

dekh laTkā sajan terī laT kā
us kī har mū-ba-mū meñ dil aTkā

ye narm haath mare haath meñ thamā diije
thakā huā huuñ zarā dil ko hausla diije

vafā hai jurm to iqrār-e-jurm hai mujh ko
ye maiñ huuñ ye mirā dil lījiye sazā diije

ye khel khelā hai jab pyaar kā to phir ai dil
ab apne aap ko bhī daañv par lagā diije

gayā nahīñ hai abhī daur aap kā 'anjum'
jo dil udaas ho to phir use sadā diije

hamāre dil meñ dhaḌaktā hai naam us kā abhī
hai ye shurū-e-mohabbat tamām thoḌī hai

ham apne man kī kareñge burā lage ki bhalā
hamārā dil hai tumhārā ġhulām thoḌī hai

mujh ko mire nasīb ne roz-e-azal se kyā diyā
daulat-e-do-jahāñ na dī ik dil-e-mubtalā diyā

dil hī nigāh-e-nāz kā ek adā-shanās thā
jalva-e-barq-e-tūr ne tuur ko kyuuñ jalā diyā

qabr meñ jab kisī tarah dil kī taḌap na kam huī
yād-e-ḳhirām-e-nāz ne hashr kā aasrā diyā

roz-e-jazā gila to kyā shukr-e-sitam hī ban paḌā
haa.e ki dil ke dard ne dard ko dil banā diyā

dil meñ samā ke phir ga.ī aas bañdhā ke phir ga.ī
aaj nigāh-e-dost ne kaaba banā ke Dhā diyā

uf ki gunāhgār ham haiñ to magar ḳhatā muaaf
aaTh pahar ke dard ne dil hī to hai dukhā diyā