Tags-Dil

miTā.e dīda-o-dil donoñ mere ashk-e-ḳhūnīñ ne
ajab ye tifl abtar thā na ghar rakkhā na dar rakkhā

ehsās-e-mohabbat se kisī gosha-e-dil meñ
jab choT ubhar aa.e to lagtā hai ki tum ho

jo baat sukūt-e-lab tak hai us se na ulajh ai jazba-e-dil
kuchh arz-e-hunar kī laag rahe kuchh mere junūñ kā kaam chale

maiñ jinheñ mil na sakā vo to munāfiq hoñge
jin ko aanā thā mire dil meñ barābar aa.e

ho gayā aaj ayaañ tere tasavvur kā tilism
dil kī dahlīz pe alfāz ke lashkar aa.e

jañg kā faisla ho chukā hai to phir mere dil kī kamīñ-gāh meñ kaun hai
ik shaqī kāTtā hai tanābeñ mire ḳhema-e-ḳhvāb kī raat bhar yā aḳhī

paayā na dil bahāyā huā sail-e-ashk kā
maiñ panja-e-mizha se samundar bilo chukā

kyā hī taptā hai sulagtā hai dhuāñ detā hai
hijr kī shaam to dil bāñdh samāñ detā hai

ek muddat se badan barf hai lekin ab tak
karvaTeñ dil ko koī soz nihāñ detā hai

aahaT aahaT pe gumāñ guzre hai vo aa pahuñche
dil-e-nādāñ ke bahalne kā tarīqa niklā

mujh pe khul jā ki mire dil meñ koī pech paḌe
apnī tanhā.ī ke asrār-e-zuleḳhāna samajh

hamāre dil ko ab tāqat nahīñ sadme uThāne kī
bahut bhāne lage jo us se milnā chhoḌ dete haiñ

kiina jo tire dil meñ bharā hai so kidhar jaa.e
mumkin hai kahīñ sañg ke pahlū se sharar jaa.e

aayā huuñ pāra-dozī-e-dil se nipaT ba-tañg
aise phaTe hue ko maiñ kab tak rafū karūñ

bas-ki har kāñTe se dil chhed ek bulbul mar rahe
ho gayā gulshan ḳhizāñ meñ bulbulistāñ al-ayāz

dil-āzārī ne terī kar diyā bilkul mujhe be-dil
na kar ab merī dil-jūī ki dil-jūī se kyā hāsil

na jab tak chaak ho dil phāñs kab dil kī nikaltī hai
jahāñ ho kaam ḳhanjar kā vahāñ suuī se kyā hāsil

abas pamba na rakh dāġh-e-dil-e-sozāñ pe tū mere
ki añgāre pe hogā chāragar ruuī se kyā hāsil

shamīm-e-zulf ho us kī to ho farhat mire dil ko
sabā hovegā mushk-chīñ kī ḳhushbūī se kyā hāsil

na hove jab talak insāñ ko dil se mel-e-yak-jānib
'zafar' logoñ ke dikhlāne ko yaksūī se kyā hāsil