Tags-Dil

ab aap kī damoñ meñ ham aa chuke haTo bhī
ḳhush aave pyāre kis ko jab dil hī kaT rahe hoñ

kyā kar sakeñ divāne hāl-e-dil-e-pareshāñ
zulfoñ ke baal un ke jab aap laT rahe hoñ

jī chāhtā hai ai dil ik aisī raat aave
matl.a ho saaf shahrā bādal bhī phaT rahe hoñ

dil ne chāhā thā jise apne sahāre kī tarah
ġham usī shaḳhs kā bhaḌkā hai sharāre kī tarah

gudgudātā hai tirī yaad kā mausam dil ko
khilkhilāte hue phūloñ ke nazāre kī tarah

jo log dīda-o-dil ko tabāh dekhte haiñ
makīn ḳhvāb ke aane kī raah dekhte haiñ

ḳhudā gavāh dil ik lamha bhī nahīñ ġhāfil
tumhārī yaad bhī baaqī hai dukh bhī baaqī hai

dil husn par nisār to kar duuñ bajā durust
jhelegā is ke ba.ad sitam kaun ham ki aap

maiñ jahāñ par thā vahāñ se lauTnā mumkin na thā
aur tum bhī aa ga.e the paas kuchh dil ke sivā

us kī mahfil ā.īna-ḳhāna to thī lekin 'surūr'
saare ā.īne salāmat the mire dil ke sivā

tirī baat kyā hai vaa.iz mirā dil vo hai ki jis ne
isī mai-kade meñ aksar mirī baat bhī na maanī

dil le ke palkeñ phir ga.iiñ zulfoñ kī aaḌ meñ
ulTe phirī ye fauj sar-e-shām luuT ke

so ga.e ik ek kar ke ḳhāna-e-dil ke charāġh
in charāġhoñ ko jagā de zindagī ai zindagī!

rāhat-e-jāñ se to ye dil kā vabāl achchhā hai
us ne pūchhā to hai itnā tirā haal achchhā hai

aao phir dil ke samundar kī taraf lauT chaleñ
vahī paanī vahī machhlī vahī jaal achchhā hai

tujh ko hai ham se judā.ī aarzū
mere dil meñ shauq hai dīdār kā

dil ne merī nahīñ sunī tauba
kyā ajab hai ye be-dilī tauba

dil le ke burā.ī karte haiñ lo aur suno lo aur suno
phir zikr-e-judā.ī karte haiñ lo aur suno lo aur suno

kabhī dair meñ haiñ kabhī ka.abe meñ kabhī dil meñ haiñ kabhī āñkhoñ meñ
ye but bhī ḳhudā.ī karte haiñ lo aur suno lo aur suno

dil ishq meñ be-pāyāñ saudā ho to aisā ho
dariyā ho to aisā ho sahrā ho to aisā ho