Tags-Dil

vasl meñ yuuñ mire pahlū ko na pahlū se dabā
TuuT jaa.e na kahīñ ābla-e-dil merā

dekhnā koī sar-e-arsh se taarā TuuTā
yā hasīñ aañkh se zālim kī girā dil merā

ruuh se dil se rishta rahā hī nahīñ
log jiite rahe jism-bhar zindagī

rabāb-e-amn-o-sukūñ ke hasīn tāroñ meñ
shikast-e-dil ke tarāne talāsh karte haiñ

ġhubār dil meñ bharā kirkirī salām-alaik
hai kis ke kaam kī ye zāhirī salām-alaik

koī sharar koī ḳhushbū ki dil na bujh jaa.e
kisī bhī naam se ḳhud ko pukārne aate

jo ham nahīñ to sar-e-rah-guzār-e-dard 'adā'
vo kaun the jo dil-o-jāñ ko vārne aate

fareb ġham hī sahī dil ne aarzū kar lī
burā hī kyā hai agar terī justujū kar lī

ġhalat hai jazba-e-dil par nahīñ koī ilzām
ḳhushī milī na hameñ jab to ġham kī ḳhū kar lī

dil-e-ġham-zada pe guzar gayā hai vo hādsa ki mire liye
na to ġham rahā na ḳhushī rahī na junūñ rahā na parī rahī

vidā.a kartā hai dil satvat-e-rag-e-jāñ ko
ḳhabar karo mire ḳhvāboñ ke shab-sulaimāñ ko

lahū ko aañkh meñ rahne kā zom thā varna
Tapak bhī saktā thā bahlā ke dil ke tūfāñ ko

har dil-fareb chiiz nazar kā ġhubār hai
āñkheñ hasīn hoñ to ḳhizāñ bhī bahār hai

kaif-e-surūr-o-soz ke qābil nahīñ rahā
ye aur dil hai ab vo mirā dil nahīñ rahā

jo kuchh matā-e-dil thī vo sab ḳhatm ho ga.ī
ab kārobār-e-shauq ke qābil nahīñ rahā

kam-mā.egī ne dil tujhe be-qadr kar diyā
duzd-e-nigāh-e-nāz ke qābil nahīñ rahā

shahr baaqī hai mohabbat kā nishāñ baaqī hai
dilbarī baaqī hai dil-dāri-e-jāñ baaqī hai

churā ke muTThī meñ dil ko chhupā.e baiThe haiñ
bahānā ye hai ki mehñdī lagā.e baiThe haiñ

chaar jānib haiñ siyah raat ke saa.e lekin
ufuq-e-dil pe na.ī sub.h kī tanvīreñ haiñ

aap ne is kā taḌapnā bhī gavārā na kiyā
dil-e-muztar se koī kaam to lene dete