Tags-Dil

ḳhud apne dil ko banā le tū āstān-e-vafā
haram kī nāsiya-sā.ī to koī baat nahīñ

nikal ga.ī thī mire muñh se dil kī baat jo kal
huī hai aaj parā.ī to koī baat nahīñ

mai-e-suḳhan se na pighle jo ābgīna-e-dil
to 'faḳhr' sho.ala-navā.ī to koī baat nahīñ

chhupā ke ḳhvāboñ ḳhayāloñ ko dil ke goshe meñ
zarā sī der haqīqat se rū-ba-rū ho leñ

kitāb-e-dil ko varaq-dar-varaq dikhā deñge
zarā ham aap se tum aur tum se tū ho leñ

safar vafā kā adhūrā adhūrā hai jaan lo 'nāyāb'
ki jab talak na dil-o-jāñ lahū lahū ho leñ

kabhī shu.ūr kabhī dil kabhī suḳhan mahke
kaho vo sher ki duniya-e-fikr-o-fan mahke

har ik makāñ se naam kī taḳhtī utar ga.ī
dil kī fasīl pe koī pahra nahīñ rahā

ai ḳhudā ajab hai tirā jahāñ mirā dil yahāñ pe lagā nahīñ
jahāñ koī ahl-e-vafā nahīñ kisī lab pe harf-e-duā nahīñ

ye jo hashr barpā hai har taraf to bas is kā hai yahī ik sabab
hai laboñ pe nām-e-ḳhudā magar kisī dil meñ ḳhauf-e-ḳhudā nahīñ

jo hañsī hai lab pe sajī huī to ye sirf zabt kā farq hai
mire dil meñ bhī vahī zaḳhm haiñ mirā haal tujh se judā nahīñ

ye jo dasht-e-dil meñ haiñ raunaqeñ ye tirī atā ke tufail haiñ
diyā zaḳhm jo vo harā rahā jo diyā jalā vo bujhā nahīñ

is ko kyā kahte haiñ 'iqbāl' kisī se pūchho
dil na ab shahr meñ lagtā hai na vīrāne meñ

maiñ pahroñ ghar meñ paḌā dil se baat kartā huuñ
jab us ke shakl-o-shamā.il se baat kartā huuñ

zamīñ kī baat hai dil meñ magar ambar nikaltā hai
sabhī dariyā ke dil meñ āj-kal sāgar nikaltā hai

hamesha dil meñ rahtī hai zamāne bhar kī kaḌvāhaT
magar jab ghar se chaltā hai sadā hañs kar nikaltā hai

dil meñ tūfān ho gayā barpā
tum ne jab muskurā ke dekh liyā

kaun phir un se dil kī baat kahe
jab vo aalī janāb ho jaa.eñ

maiñ ne jo kuchh kho diyā ab is ko pā saktā nahīñ
dil se ye ehsās bhī lekin miTā saktā nahīñ

dil dukhāte ho bevafā kah kar
kyā mujhe aazmā nahīñ sakte