Tags-Dil

ik chamak āñkhoñ meñ aa jaatī hai us ko dekh kar
varna dil to muttafiq hai aap se, zar kuchh nahīñ

shab jo dil do do haath uchhaltā thā
vajd thā yā vo haal thā kyā thā

rakhī na ga.ī dil meñ koī baat chhupā kar
dīvār se Thahrā thā koī kaan lagā kar

baat khote jo iltijā karte
ai dil-e-nā-murād kyā karte

dil silsila-e-shauq kī tash.hīr bhī chāhe
zanjīr bhī āvāza-e-zanjīr bhī chāhe

us kī taqdīs pe dhabba nahīñ lagne detā
dāman-e-dil ko hisāboñ se alag rakhtā huuñ

us ke dar par nahīñ likhtā maiñ hisāb-e-duniyā
dil kī masjid ko ḳharāboñ se alag rakhtā huuñ

yahī taqāzā hai maslahat kā isī meñ hai āfiyat bhī 'ātish'
kisī se dil ko jo rañj pahuñche use ḳhudā kī razā kaheñ ham

ba-rañg-e-naġhmā bikhar jaanā chāhte haiñ ham
kisī ke dil meñ utar jaanā chāhte haiñ ham

dildār us ko ḳhvāh dil-āzār kuchh kaho
suntā nahīñ kisū kī mirā yaar kuchh kaho

ġhamza adā nigāh tabassum hai dil kā mol
tum bhī agar ho us ke ḳharīdār kuchh kaho

koī dil kī chāhat se majbūr hai
jo bhī hai vo zarūrat se majbūr hai

apne dil kī lagī ko chhupāte ho kyuuñ
ye mohabbat kī ghaḌiyāñ gañvāte ho kyuuñ

tumhāre dil pe bhī kuchh to asar huā hogā
gire-paḌe hue lafzoñ ko dhaar dī ga.ī hai

tavīl hijr kī muddat bhī ham faqīroñ ko
ḳhulūs-e-dil se ba-sad iḳhtisār dī ga.ī hai

ḳhudāvandā ye tere sāda-dil bande kidhar jaa.eñ
ki darveshī bhī ayyārī hai sultānī bhī ayyārī

milne kī ḳhvāhisheñ sabhī dam toḌtī ga.iiñ
dil meñ kuchh aise ḳhauf bichhaḌne kā bas gayā

dil pe jo biite sah lete haiñ apnī zabāñ meñ kah lete haiñ
'inshā'-jī ham log kahāñ aur 'mīr' kā rañg-e-kalām kahāñ

dil ke suune sahn meñ gūñjī aahaT kis ke paañv kī
dhūp-bhare sannāTe meñ āvāz sunī hai chhāñv kī

phir jaane ham mileñ na mileñ ik zarā ruko
maiñ dil ke ā.īne meñ ye manzar sameT luuñ