Tags-Dil

ḳhudā āḳhir karegā ḳhush mirā dil
mujhe apne tavakkul kī qasam hai

dil kī bisāt kyā thī jo sarf-e-fuġhāñ rahā
ghar meñ zarā sī aag kā kitnā dhuāñ rahā

mahshar bhī koī dard hai jo uTh ke rah gayā
shikva bhī koī ġham hai jo dil meñ nihāñ rahā

dil bhī gayā jigar bhī gayā jaan bhī ga.ī
maiñ phir bhī dekhtā hī tirī shoḳhiyāñ rahā

chhup sakā dam bhar na rāz-e-dil firāq-e-yār meñ
vo nihāñ jis dam huā sab āshkārā ho gayā

ham-kinārī kī havas ai gauhar-e-yaktā ye hai
aab ho kar ġham se dil dariyā hamārā ho gayā

dil meñ hai ai 'barq' us but ke dar-e-dandāñ kī yaad
ye guhar arsh-e-barīñ kā goshvāra ho gayā

dekhnā dekhnā kyā dil meñ lagī ātish-e-ishq
kyuuñ mirā nāla-e-ḳhūñ-bār sharar-bār hai aaj

husn-e-kalām khīñche kyūñkar na dāman-e-dil
is kaam ko ham āḳhir mahbūb kar chuke haiñ

har lahza hai tazāyud ranj-o-ġham-o-alam kā
ġhālib ki taba-e-dil ko maġhlūb kar chuke haiñ

tujh meñ samā na jā.ūñ agar merā bas chale
ye dil dhaḌakne saañs ke chalne meñ aa rahūñ

haañ us ke ta.āqub se mire dil meñ hai inkār
vo shaḳhs kisī ko na milegā na milā hai

kyuuñ nūr-e-abad dil meñ guzar kar nahīñ paatā
siine kī siyāhī se nayā harf likhā hai

gar hai dīdār-talab saaf kar apne dil ko
rū-ba-rū us ke to ā.īna-dilāñ jaate haiñ

TūTnā thā dil-e-nāzuk ko na pūchh
kab kahāñ kis liye kyūñ-kar TuuTā

vo sanam ka.ī din se hai mujh se ḳhafā nahīñ aatā idhar ko ḳhudā kī qasam
dil-e-mushfiq-e-man use khīñch to lā tujhe jazba-e-kāh-rubā kī qasam

tanhā.ī meñ bhī tere tasavvur kī badaulat
dil-bastagi-e-ġham ke haiñ sāmān hazāroñ

āñkhoñ ne tujhe dekh liyā ab unheñ kyā ġham
hālāñki abhī dil ko haiñ armān hazāroñ

ashk Dhalte nahīñ dekhe jaate
dil pighalte nahīñ dekhe jaate

abhī to dil meñ halkī sī ḳhalish mahsūs hotī hai
bahut mumkin hai kal is kā mohabbat naam ho jaa.e