Tags-Dil

merī taqdīr kā mire dil kā
un ke hāthoñ meñ hai banāv bigāḌ

shola-e-ġham se dil kā haal ye hai
jaise pahlū meñ jal rahā ho bhaaḌ

dil ke andar dimāġh hai us ke
jis ke dil meñ savāl aayā hai

saare manzar dilkash the har baat suhānī lagtī thī
jīvan kī har shaam hameñ tab ek kahānī lagtī thī

dil-e-be-tāb pe maazī kī navāzish hai vahī
shab-e-mahtāb pe yādoñ kā gahan hai ki jo thā

unheñ kyā fikr ki pūchheñ dil-e-bīmār kā haal
be-niyāzāna vo andāz-e-suḳhan hai ki jo thā

abas hai raaz ko paane kī justujū kyā hai
ye chāk-e-dil hai use hājat-e-rafū kyā hai

gulsitāñ meñ paḌ ga.ī hai rasm-e-tajsīm-e-bahār
apne chehre par har ik gul ḳhūn-e-dil malne ko hai

har na.ī manzil kī jānib sūrat-e-abr-e-ravāñ
mere hāthoñ se nikal kar merā dil chalne ko hai

baḌhūñ to aage dhueñ ke bādal haTūñ to pīchhe balāoñ ke dal
ye kaisā manzar yahāñ vahāñ hai na koī aahaT na koī halchal

sukūt siine meñ aisā kab thā gumāñ bhī guzre na dhaḌkanoñ kā
ḳhudā hī jaane ki dil kahāñ hai na koī aahaT na koī halchal

zindagī ab tū mujhe aur khilaune lā de
aaise ḳhvāboñ se to maiñ dil nahīñ bahlā saktā

nikal gayā mirī āñkhoñ se misl-e-ḳhvā-o-ḳhayāl
guzar gayā dil-e-raushan se vo nazar ban kar

jo mere dil kī ujaaḌ bastī meñ ek mausam Thahar gayā hai
balā se aa.e bahār yā phir ḳhizāñ ruteñ kyā shumār karnā

munāfiqat ke ġharaz ke rishtoñ meñ kyuuñ vafā ko talāshtī ho
ḳhulūs-e-dil gar na ho to aisī qarābateñ kyā shumār karnā

ye sīm-o-zar ye harīr-o-atlas ye jāh-o-hashmat ye auj-o-sarvat
sukūn-e-dil hī na de sakeñ jo vo rāhateñ kyā shumār karnā

kis kī āñkhoñ kā liye dil pe asar jaate haiñ
mai-kade haath baḌhāte haiñ jidhar jaate haiñ

dil meñ armān-e-visāl aañkh meñ tūfān-e-jamāl
hosh baaqī nahīñ jaane kā magar jaate haiñ

bhūltī hī nahīñ dil ko tirī mastāna nigāh
saath jaatā hai ye mai-ḳhāna jidhar jaate haiñ

pursish-e-dil to kujā ye bhī na pūchhā us ne
ham musāfir kidhar aa.e the kidhar jaate haiñ