Tags-Dil

mire dil kī raakh kured mat ise muskurā ke havā na de
ye charāġh phir bhī charāġh hai kahīñ terā haath jalā na de

tujh ko pā kar bhī na kam ho sakī be-tābī-e-dil
itnā āsān tire ishq kā ġham thā hī nahīñ

aaj se dil ye bazm hai un kī
ye harīm-e-tasavvurāt nahīñ

turfa chaman khilā hai dil-e-dāġh-dār kā
ya.anī ḳhizāñ se kaam liyā hai bahār kā

TukḌe TukḌe dil huā jaatā hai pahlū meñ 'havas'
zab.h kartī hai butāñ kī kam-nigāhī kyā karūñ

dil meñ armān the kyā ahd-e-bahārāñ ke liye
chāk-e-gul dekh ke ab chāk-e-jigar hotā hai

saiñkaḌoñ zaḳhm use milte haiñ is duniyā se
koī dil terā talabgār agar hotā hai

kahāñ kī be-qarārī bekalī aur kaisī bechainī
hathelī aap kī jab is dil-e-muztar pe rakkhī hai

kabhī ham us ko dil kā bojh samjhe haiñ na samjheñge
jo gaThrī zimmedārī kī hamāre sar pe rakkhī hai

jab dil se dil mil jaatā hai vo daur-e-mohabbat aah na pūchh
kuchh aur hī din ho jaate haiñ kuchh aur hī rāteñ hotī haiñ

tūfān kī maujoñ meñ ghir kar pahuñchā bhī hai koī sāhil tak
sab yaas ke aalam meñ dil ko samjhāne kī bāteñ hotī haiñ

ab kahāñ tak pattharoñ kī bandagī kartā phirūñ
dil se jis dam bhī pukārūñgā ḳhudā mil jā.egā

Duubī jaatī hai zabt kī kashtī
dil meñ tūfān-e-iztirāb uThā

andar kā hī na ho zarā bāhar bhī dekh le
dil ḳhuun hai to aañkh pe ḳhūnīñ samāñ na khol

mat kar āzād dām-e-zulf siiñ dil
bāl-bāñdhā ġhulām hai terā

lashkar-e-ġham ne dil siiñ kuuch kiyā
jab se is meñ maqām hai terā

vo bhī mere liye kuchh sochtā hai sochtā huuñ
kaise dil se mire ye ḳhām-ḳhayālī jaa.e

ḳhalvat-e-dil tire liye ā.ūñgī jald lauT ke
milne ko aa.e mehmāñ ghar ke do chaar kaam haiñ

kyā mire paas kaam patjhaḌ kā
dil meñ sarsabz baaġh rakhtā huuñ

guzar rahī hai jo dil par vahī haqīqat hai
ġham-e-jahāñ kā fasāna ġham-e-hayāt se pūchh