Tags-Dil

betāb huā jaatā hai dil zikr se us ke
kyā pūchhte ho kaun thī vo aur kahāñ thī

tamām gard-o-ġhubār dil se nikal chukā thā
baras chukā abr-e-ashk khul kar to maiñ ne dekhā

dil meñ thī par laboñ tak aa na sakī
ārzū-e-visāl thī kyā thī

ai dil na aqīda hai davā par na duā par
kam-baḳht tujhe chhoḌ diyā ham ne ḳhudā par

dil lene ke andāz kā kuchh naam nahīñ hai
mauqūf hai ye chiiz adā par na hayā par

allāh mujhe kam se kam itnā to banā de
ek ek to dil duuñ tirī ek ek adā par

taklīf hamesha dil-e-ḳhud-sar ne uThā.ī
aa.ī haiñ balā.eñ bahut us ek balā par

ham itne pareshāñ the ki hāl-e-dil-e-sozāñ
un ko bhī sunāyā ki jo ġham-ḳhvār nahīñ the

dekhne ko abhī dil taḌpā ki tum aa pahuñche
kashish-e-dil ki tumhārī ye karāmāt kahūñ

vo koī shāḳh ho mizrāb ho yā dil ho 'azīz'
TūTne vaalī kisī shai kā bharosā na karo

āftāb aur ye siyah-ḳhāna
tū ne dekhā hai dil ke daaġh meñ kuchh

ai 'qamar' aañkh se utar dil meñ
zau-fishānī ho dil ke baaġh meñ kuchh

dūd-e-afġhān-o-rag-e-jān-o-suvaidā dil meñ hai
band hai qindīl ke andar dhuāñ battī charāġh

kāñptā hai haath tāsīr-e-dil-e-betāb se
maiñ karūñ raushan to ho muztar dhuāñ battī charāġh

dil kahīñ bhī nahīñ lagtā hogā
dil nahīñ māntā aisā hogā

shāhoñ ke dil to sañg haiñ shāhoñ kā zikr kyā
ye bhī nahīñ ki haal gadā kā gadā sune

kyā dil-ḳharāsh kaam huā hai mire supurd
ik zard rut ke barg-o-samar chun rahā huuñ maiñ

dil-e-shab meñ sub.h kī dhaḌkaneñ abhī ibtidā-e-ġhazal meñ thiiñ
ki vo aa.e aur tamām sher mirī hī dhun meñ sunā ga.e

dil bhī hāzir sar-e-taslīm bhī ḳham ko maujūd
koī markaz ho koī qibla-e-hājāt to ho

dil to bechain hai iz.hār-e-irādat ke liye
kisī jānib se kuchh iz.hār-e-karāmāt to ho