Tags-Dil

vo ek baat jo dil meñ hai mere us ke liye
zabāñ se kahtā nahīñ vo magar samajhtā hai

dil-pāroñ kī ham jo nigahbānī karte
nuur sahāre apnī nigarānī karte

ye patthar sī tanhā.ī ye bhārī bojhal raat
jaane kaisā bojh hai dil par nas nas TuuTī jaa.e

kis tarah manzileñ tai hoñgī badan kī ai dil
us se miltā huuñ to dīvār lage hai vo bhī

mirī dāstāñ bhī ajiib hai vo qadam qadam mire saath thā
jise rāz-e-dil na batā sakā jise dāġh-e-dil na dikhā sakā

aap ārā.ish-e-gesū meñ lage haiñ nāhaq
fāteh-e-dil to mohabbat kī nazar hotī hai

do jhukī āñkhoñ kā pahuñchā jab mire dil ko salām
yuuñ lagā hai dopahar meñ jaise dar aa.ī ho shaam

dukh kisī kā ho use dhaḌkan meñ apnī sīñch le
kis ne sauñpā hai mire dil ko ye pāgal-pan kā kaam

harf jaise ho ga.e saare munāfiq ek dam
kaun se lafzoñ meñ samjhā.ūñ tumheñ dil kā payām

merī ulfat kā hai dil meñ tire ānā-jānā
koī dīvār lagā duuñ ye kahāñ mumkin hai

toḌ kar dil ko 'sikhar' us ne ḳhatā kī lekin
apne dilbar ko sazā duuñ ye kahāñ mumkin hai

na pūchho zaḳhm-hā-e-dil kā aalam
chaman meñ aisī gul-kārī nahīñ hai

vahī huā hai jo hotā hai sone vāloñ se
ai mere dil tire pahlū-nashīñ chale ga.e haiñ

ham kuchh na kisī se kahte haiñ ham kuchh na kisī kī sunte haiñ
baiThe hue bazm-e-dilkash meñ bas dil ke TukḌe chunte haiñ

dil sā bhī koī hamdard nahīñ ham sā bhī koī dil-soz nahīñ
ham jalte haiñ to dil jaltā hai dil bhuntā hai to ham bhunte haiñ

aa.heñ na kabhī muñh se niklīñ naale na kabhī aa.e lab tak
ho zabt-e-tap-e-ulfat kā burā ham dil hī dil meñ bhunte haiñ

'fā.iq' gudāz-e-dil hai mohabbat meñ asl shai
ye sail-e-ashk-e-ḳhām ye dāmān-e-tar ġhalat

tujhe hādsāt-e-paiham se bhī kyā milegā nādāñ
tirā dil agar ho zinda to nafas bhī tāziyāna

us but meñ nūr-e-qudrat-e-ḳhāliq hai mustatar
patthar ne kyā chhupāyā hai dil meñ sharār ko

dard-e-dil le ke kahīñ aur bhalā kyoñ jā.ūñ
sāmne jab mire terā ye matab hai sā.īñ