Tags-Dil

kaThin hai kaam to himmat se kaam le ai dil
bigāḌ kaam na mushkil samajh ke mushkil ko

ḳhabar huī na unheñ mere muztarib dil kī
ġhalat ḳhayāl hai ye dil se raah hai dil ko

dard-e-dil ne lī na thī karvaT abhī
un ke māthe pe pasīnā aa gayā

koī aa.egā to jalā degā
dil kī battī bujhā ke baiThā huuñ

dil kā sab haal bayāñ kar ga.iiñ muḳhbir āñkheñ
rog paalā thā kabhī aaj asar tak pahuñchā

ab bhī vo rū-e-dil-nashīñ zard sahī hasīñ to hai
jaise jabīn-e-āftāb marhala-e-zavāl meñ

ahl-e-sitam ke dil meñ hai kyā mire karb kā hisāb
un ko ḳhabar nahīñ ki maiñ mast huuñ apne haal meñ

jo ahl-e-dil haiñ alag haiñ vo ahl-e-zāhir se
na maiñ huuñ shaiḳh kī jānib na barhaman kī taraf

dam koī dam kā hai mehmāñ alvidā.a
dard-o-ġham mere dil-o-jāñ alvidā.a

nūr-afshāñ hai vo zulmat meñ ujāloñ kī tarah
ham ne puujā hai jise dil se shivāloñ kī tarah

ḳhūn-e-ummīd huā ḳhūn-e-tamannā gaahe
dil chhalaktā hī rahā mai ke piyāloñ kī tarah

jab farāmosh kareñge hameñ duniyā vaale
aur ubhar ā.eñge ham dil meñ ḳhayāloñ kī tarah

dil to kyā chiiz hai ham ruuh meñ utre hote
tum ne chāhā hī nahīñ chāhne vāloñ kī tarah

bair na rakkho dil meñ achchhī baat nahīñ
aisā har ilzām burā hai chhī chhī chhī

dil tire ba.ad so gayā varna
shor thā is makāñ meñ kyā kyā kuchh

ġham-zada dil hai aur bhī ġhamgīñ
giit kyā gungunā rahī hai raat

dil ke sahrā meñ zaḳhm khilte haiñ
dard kaisā jagā rahī hai raat

rakhe na dil meñ kisī kī chintā gale meñ Daale birah kī kanThā
daras kī ḳhātir tumhāre mantā bhikāran apnā baran banāyā