Tags-Dil

kyā kahe hāl-e-dil ġharīb 'jigar'
TuuTī phūTī zabān hai pyāre

idhar to aañkh barastī hai dil dhaḌaktā hai
ye sānehāt tumhāre yahāñ nahīñ hote

ai sālik intizār-e-haj meñ kyā tū hakka-bakkā hai
bagūle sā to kar le tauf dil pahlū meñ makka hai

dīdār se pahle hī kyā haal huā dil kā
kyā hogā jo ulTeñge vo ruḳh se naqāb āḳhir

vo bevafā koī dam aur jo Thahar jaatā
rah-e-talab meñ ye dil yuuñ na dar-ba-dar jaatā

sarfaroshī kī tamannā ab hamāre dil meñ hai
dekhnā hai zor kitnā bāzu-e-qātil meñ hai

dil se hamdam ne rah-e-ulfat meñ ye dhokā diyā
kyā kare ab koī duniyā meñ bharosā yaar kā

dil diyā jis ko usī ne dāġh-e-māyūsī diyā
raas hī aayā na ham ko haa.e karnā pyaar kā

dil meñ jab se huā qayām tirā
har koī pūchhtā hai naam tirā

betābi-e-dil tere shahīdoñ kī kahāñ jaa.e
kuchh kam rag-e-bismil se nahīñ taar kafan kā

detā hai phir ā.īne ko kis vāste bosa
vo aap jo dil-dāda nahīñ apne dahan kā

jā basā thā jo kisī hijr ke sahrā meñ kabhī
ai havāo kaho is dil kī ḳhabar hai koī

kisī ta.alluq ke TūTne kā azaab donoñ ke dil par utrā
maiñ aks ban ke Thahar gayā thā vo ā.īne kī tarah se chup thā

paḌāv Daale kisī ne aa ke hazār kosoñ kī dūriyoñ meñ
hamārā dil ki kisī parinda ke ghoñsle kī tarah se chup thā

zaḳhm-e-dil kī jalan bhī kam thī bahut
giit aisā sabā ne gaayā thā

is tarah vo nigāh-e-karam aaj kar ga.e
dil ko surūr-e-bāda-e-ulfat se bhar ga.e

vo ham ko apne dil ke hī andar nihāñ milā
jis kī talāsh karte hue dar-ba-dar ga.e

dil le gayā hameñ phir usī bevafā ke paas
jaanā nahīñ thā ham ko jahāñ ham magar ga.e

sañg-e-dar us kā har ik dar pe lagā miltā hai
dil ko āvāra-mizājī kā mazā miltā hai

jo bhī gul hai vo kisī pairhan-e-gul par hai
jo bhī kāñTā hai kisī dil meñ chubhā miltā hai