Tags-Dil

tum ko dikhlā.eñge dil kī tasvīr
jā-ba-jā rañg abhī bharnā hai

rok lo girya-e-ḳhūnīñ ko 'azīz'
dil kā nāsūr abhī bharnā hai

'vāsil' ke dāġh-e-dil se hai manzil kī raushnī
varna nikal ke aate bhalā tīrgī se ham

jis kī dīd-o-talab vahm samjhe the ham rū-ba-rū phir sar-e-rahguzār aa gayā
sub.h-e-fardā ko phir dil tarasne lagā umr-e-rafta tirā e'tibār aa gayā

rut badalne lagī rañg-e-dil dekhnā rañg-e-gulshan se ab haal khultā nahīñ
zaḳhm chhalkā koī yā koī gul khilā ashk umDe ki abr-e-bahār aa gayā

ḳhūn-e-ushshāq se jaam bharne lage dil sulagne lage daaġh jalne lage
mahfil-e-dard phir rañg par aa ga.ī phir shab-e-ārzū par nikhār aa gayā

'faiz' kyā jāniye yaar kis aas par muntazir haiñ ki lā.egā koī ḳhabar
mai-kashoñ par huā mohtasib mehrbāñ dil-figāroñ pe qātil ko pyaar aa gayā

tamām umr musallat rahā vo dil pe mire
tamām umr maiñ zālim kā mezbān rahā

na dil meñ jaltī huī aag bujh sakī 'ābid'
na sar pe mere kabhī koī sā.ebān rahā

parde meñ har āvāz ke shāmil to vahī hai
ham laakh badal jaa.eñ magar dil to vahī hai

mahsūs jo hotā hai dikhā.ī nahīñ detā
dil aur nazar meñ had-e-fāzil to vahī hai

har chand tire lutf se mahrūm nahīñ ham
lekin dil-e-betāb kī mushkil to vahī hai

aaj lekin thake hue dil par
jism kā taar taar bhārī hai

dil kī qurbān gaah ke aage
ek TuuTā huā diyā bhī nahīñ

jahāñ pe hotā hai dil pe nuzūl-e-bār-e-azāb
vahīñ se hotā hai duniyā kā ye nizām shurūa

mire sāqiyā mujhe bhuul jā
mire dilrubā mujhe bhuul jā

ai gadāgar ḳhudā kā naam na le
is se insāñ kā dil nahīñ hiltā

dil meñ umañg āñkhoñ meñ hasrat liye phirūñ
maiñ shahr shahr terī mohabbat liye phirūñ

rusvā.iyoñ ke ḳhauf se ḳhāmoshiyoñ ke saath
maiñ dil meñ tere pyaar kī lazzat liye phirūñ

ubhregā tere lab se kabhī harf-e-dostī
dil meñ is intizār kī hasrat liye phirūñ