Tags-Dil

zamāne bhar ke ġhamoñ se alag thalag rah kar
sukūñ bahut hai magar hai dil-e-sukūñ barbād

lauT jaane ko bahut dil machlā
kyā pas-e-gard-e-safar yaad aayā

sarishk-e-ġham simaT kar dil ke armānoñ ko le Duube
ye sāhab-ḳhāna apne saath mehmānoñ ko le Duube

vā.e-nādānī ki paidā kar ke tujh se bad-zanī
aap apne dil ko ḳhud nāshād kar letā huuñ maiñ

kar ke mustaqbil kī kuchh rañgīniyoñ pe e'timād
ġham-zada dil ko bhī apne shaad kar letā huuñ maiñ

kuchh tasavvur se tire kuchh dil se ho kar ham-kalām
apnā yuuñ furqat-kada ābād kar letā huuñ maiñ

ye zabt zabt-e-ġham nahīñ ik be-dilī sī hai
ye dil harīf-e-dard nahīñ dil na kah ise

jaane vaale ne hamesha kī judā.ī de kar
dil ko āñkhoñ meñ dhaḌakne ke liye chhoḌ diyā

taqrīr dil jalātī hai sunñe se ai 'surūr'
aatā hai kaun mujh sharar-afshāñ ke sāmne

nikālūñ kis tarah siine se apne tīr-e-jānāñ ko
na paikāñ dil ko chhoḌe hai, na dil chhoḌe hai paikāñ ko

koī yaad phir dil meñ aa kar basī hai mahak sī huī hai
koī ḳhvāb āñkhoñ meñ phir pal rahā hai diyā jal rahā hai

dard-e-dil meñ kamī na ho jaa.e
dostī dushmanī na ho jaa.e

yahī jo tere mire dil kī rājdhānī thī
yahīñ kahīñ pe tirī aur mirī kahānī thī

ajiib sā.at-e-be-rañg meñ tū bachhḌā thā
ki dil lahū thā mirā aur na aañkh paanī thī

āñkhoñ kā thā qusūr na dil kā qusūr thā
aayā jo mere sāmne merā ġhurūr thā

har vaqt ik ḳhumār thā har dam surūr thā
botal baġhal meñ thī ki dil-e-nā-subūr thā

koī to dardmand-e-dil-e-nā-subūr thā
maanā ki tum na the koī tum sā zarūr thā

lagte hī Thes TuuT gayā sāz-e-ārzū
milte hī aañkh shīsha-e-dil chuur chuur thā

jis dil ko tum ne lutf se apnā banā liyā
us dil meñ ik chhupā huā nashtar zarūr thā

us chashm-e-mai-farosh se koī na bach sakā
sab ko ba-qadr-e-hausla-e-dil surūr thā